Алесь Тодараў расказвае на budzma.org аб тым, чаму кожную раніцу варта хаця б нейкі час вылучаць выключна на сябе.

Вы павінны выпрацаваць у сябе звычку кожную раніцу пакідаць як найменш каля гадзіны часу на сябе. Гаворка, вядома, не аб прыняцці душа ці іншых гігіенічных працэдурах. Вы павінны прачнуцца, падумаць пра сябе, пра свае планы на дзень, на месяц, на год, на жыццё ў цэлым. Паразважаць над тым, як вы збіраецеся дасягаць пастаўленых у гэтым жыцці мэтаў.

Паспрабуйце практыкаваць ранішнія медытацыі, гэта дапамагае структураваць свае думкі, развіць унутраны дыялог. Уключыце спакойную музыку, набярыцеся сіл, усведамляйце, што вы поўныя сілаў, а вашая свядомасць — бясконцая крыніца магчымасцяў.

Зазвычай бывае як? Тэлефануе нехта, грыміць будзільнік, падрываешся, бяжыш у душ, хутка апранаешся, хапаеш нешта з ежы. І калі з такога хаосу пачынаецца ледзь не кожны дзень, то ці варта здзіўляцца, што хаосам ён працягваецца, ды і наогул складваецца ўражанне, што так праходзіць усё жыццё. У вечнай спешцы, без разумення таго, куды і для чаго мы ўсе бяжым і навошта наогул усё гэта адбываецца.

Чытайце па тэме: Пяць парадаў, як зрабіць свой ранак сапраўды добрым

Калі вы пачнеце прачынацца раней, і частку часу прысвячаць сабе, то абавязкова навучыцеся жыць спакойна, атрымліваць асалоду ад жыцця, а таксама навучыцеся аналізаваць свае ўчынкі, думкі, меркаванні, жаданні. І гэта ўжо будзе вельмі вялікім крокам да пачатку сур’ёзнага самаўдасканалення.

Кантралюйце свой час

Час — самы каштоўны рэсурс. Можна паспяваць больш, калі кантраляваць яго і ведаць, што менавіта і калі менавіта робіш. Бо час, які быў выдаткаваны марна, ужо не вернеш. Гэта самы прадуктыўны, але разам з тым незваротны рэсурс з усіх магчымых.

Суперпрадуктыўныя людзі імкнуцца праводзіць з карысцю кожную сваю хвіліну. Размяркоўвайце свой час на ўсе справы, якія вам трэба зрабіць цягам дня. Кожная задача павінна быць рэалістычнай, выканальнай і мець выразныя часавыя рамкі. Так вам будзе лягчэй засяродзіцца на нечым канкрэтным, і вы зможаце паспець больш.

Таксама абавязкова плануйце перапынкі. Кароткі шпацыр, кніга ці падкаст дапамогуць пераключыцца, аднавіць сілы і кантраляваць сваё жыццё ў цэлым.

Як зрабіць «ранак для сябе» звычкай?

Ажыццяўляйце змены па рэжыме дня павольна. Нікуды не спяшайцеся.

Пачаць, пэўна, варта з вячэрніх спраў. Запішыце ключавыя пункты таго, што вы зрабілі цягам дня. Такі падыход можа падацца трывіяльным, але гэта пакажа, як вы правялі свой дзень.

Даследаванне Гарвардскай школы бізнэсу паказвае, што ўсяго 15 хвілін пісьмовага натавання ў канцы дня могуць даць вам магчымасць стаць больш прадуктыўнымі на працы на наступны дзень.

Затым трэба прывыкнуць уставаць на гадзіну раней, каб праводзіць гэты час так, як хочаце менавіта вы.

Калі такі пад’ём стане звычкай, складзіце спіс з 10 ці 15 маленькіх выканальных задачаў, якія будуць вас зараджаць энергіяй на ўвесь астатні дзень. Раздрукуйце іх на аркушы паперы, або разборліва занатуйце, каб было зручней сачыць. Выконвайце гэты план цягам 30 дзён, прывыкаючы да арганізаванай вамі ж паслядоўнасці.

Чытайце па тэме: Правілы прадуктыўнага дня

Нарэшце, знайдзіце адну задачу, якая акажа найбольшы ўплыў на вашае цяперашняе жыццё, і займіцеся яе ажыццяўленнем у гэтую ранішнюю гадзіну.

Калі такі падыход стане для вас абсалютнай нормай, смела пераходзьце да вырашэнне іншых важных асабіста для вас задачаў.

Пачынайце з самага цяжкага

У кожным спісе справаў заўжды будзе пункт, які ну ніяк не хочацца выконваць. Кожны хаця б некалькі разоў, калі не кожны дзень, сутыкаўся з такім па жыцці.

Думкі аб такой задачы могуць мучыць Вас увесь дзень (ці ўвесь тыдзень або нават месяц), пакуль нарэшце, адклаўшы яе незлічоную колькасць разоў і пасля доўгіх пакут, вам усё ж давядзецца выканаць яе, каб нарэшце выкрэсліць гэтую задачу са спісу.

Вось просты спосаб пазбягаць падобных сітуацый: выконвайце самыя непрыемныя, але абавязковыя да выканання задачы першымі. Замест таго, каб бясконца думаць аб іх, проста прыбірайце іх са шляху ў самую першую чаргу. Не варта чакаць лепшых умоваў, бо іх проста можа не быць.

Раніца — гэта такі час, калі вы адчуваеце сябе бадзёрымі і поўнымі энергіі. А гэта значыць, што вам будзе прасцей прыдумляць эфектыўныя рашэнні для цяжкіх праектаў. Ваш дзень гарантавана будзе праходзіць нашмат лягчэй, а не наадварот.

Правільнае харчаванне, фізічныя нагрузкі і паўнацэнны адпачынак. Усё гэта забяспечыць вашу прадуктыўнасць цягам дня.

Поспехаў!

Алесь Тодараў, budzma. org