Цудоўнае свята падрыхтавалі арганізатары фестывалю абсалютнага адпачынку і забаваў Relax Weekend для тых, хто ўжо вярнуўся з лецішчаў, проста апынуўся суботнім днём 18 жніўня ў Мінску і наведаў дзіцячы парк імя Горкага.
Тут кожны мог знайсці сабе занятак на свой густ. На шырокай паляне пад меладычны фон далёкага дыджэя можна было паваляцца на пуфах і пагутарыць з сябрамі. Пад шатром размясціліся дэвайсы аднаго з мабільных аператараў, дзе можна было атрымаць фатаграфію сабе на электронную пошту, праўда, пры гэтым адстаяць чаргу з ахвотных. Тут жа працавала зона wi-fi.
Калі хто апынуўся на гэтым свяце жыцця без пары, можна было скарыстацца паслугамі клуба экспрэс-знаёмстваў.
Аматары спартыўных забаваў гулялі ў фрысбі або актыўнічалі ў зоне катання на роліках. Пацешна было сустрэць тут маладых. Застаецца спадзявацца, што фотасесія будзе цікавая.
Для тых, хто шукаў гармоніі і спакою, была арганізаваная зона ёгі з майстар-класамі для дзяцей, парнай ёгі і танцу Шывы.
У арт-зоне прайшла “Арт-сушка”: як і на “Фотасушцы”, тут дазвалялася ўзяць любую працу, але наўзамен пакінуць-намаляваць сваю. Дарэчы, намаляваць – не праблема. Любога ахвотнага забяспечвалі мальбертам і прыладамі для малявання ў залежнасці ад таго, у якой тэхніцы задумвалася праца. За адным столікам расказвалі пра тонкасці малявання мандалы, а за суседнім вучыліся рабіць лялькі.
Дарэчы, усе фестывальныя пляцоўкі працавалі бясплатна.
Бліжэй да вечара на набярэжнай прайшоў флэш-моб па пусканні мыльных бурбалак.
Асноўныя мерапрыемствы для тых, хто прыйшоў актыўна патанчыць, адбываліся, зразумела, на галоўнай сцэне парку. Уперамешку з выступам заяўленых музыкаў (а гэта былі Alen Hit, Ring Girls, Tesaurus, Tomato Jam і іншыя) вядоўцы праводзілі конкурс за конкурсам, дзе можна было выйграць прыемныя падарункі ад арганізатараў.
І нават моцны лівень, які прайшоў у другой палове дня, не змог ні спужаць публіку, ні падмачыць яе настрой.
Зарына Кандрацьева
