14 красавіка 2017 года а 17-й гадзіне адкрыецца персанальная юбілейная выстава жывапісу Мікалая Ісаёнка «Зачараваны імгненнем».
«Пішу сваю Айчыну без прыкрасаў, але заўжды з душэўным хваляваннем. Лічу, што без каранёў, без пачуцця нацыянальнага мастак не можа спраўдзіцца як творца. А гэта пачуццё ўзнікае яшчэ пры нараджэнні – і фізічным, і духоўным. Калі будзеш піць чужую ваду, есці экзатычную, але чужую ежу – ты і сам станеш іншым. Быць нацыянальным – значыць штодзённа наталяцца ад той зямлі, на якой жывеш, і сваё захапленне штодзённа адлюстроўваць на палатне».
Мікалай Ісаёнак
Мікалай Ісаёнак – прызнаны майстар пейзажнага жывапісу, які віртуозна валодае колеравай драматургіяй палатна, лірык, што аддае перавагу чароўнай паэзіі ўтульных і някідкіх закуточкаў беларускай прыроды.
У сваіх лепшых карцінах мастак здолеў адчуць рытмы ландшафтаў, спалучыць эмацыянальныя і рацыянальныя асновы пабудовы палатна. Ён захапляецца цудам, створаным прыродай, занатоўвае ў шматлікіх эцюдах яе зменлівы стан, «прымервае» да будучых карцін.
ІСАЁНАК МІКАЛАЙ ІОСІФАВІЧ нарадзіўся 21 сакавіка 1947 года ў вёсцы Чарневічы Барысаўскага раёна Мінскай вобласці. Вучыўся ў мастацкай студыі пры Доме піянераў у Барысаве, Мінскім мастацкім вучылішчы (1965–1973, з перапынкам на акадэмічны водпуск і вайсковую службу) у Альгерда Малішэўскага, Леаніда Шчамялёва, Міхаіла Лісоўскага, Трафіма Ігнаценкі. Жыве ў Мінску з 1965 г. Удзельнік выстаў з 1975 г.
Сябра Саюза мастакоў БССР з 1981 (секцыя жывапісу). Узнагароджаны дыпломам Акадэміі мастацтваў СССР (1983). Імя Мікалая Ісаёнка занесена ў слоўнік Міжнароднага Кембрыджскага біяграфічнага цэнтра (Вялікабрытанія).
Прадстаўленыя творы на выставе з майстэрні мастака.
