Свята смачнай ежы і добрага настрою DranikFest-2018 прайшло ў Магілёве ў суботу, 29 верасня. У гэты дзень, нягледзячы на дождж, на этнахутар “Зялёны гай” прыехала больш за дзесяць тысяч беларусаў, каб паесці дранікаў і пірагоў, папіць гарачага чаю і проста клёва прабавiць час.
З кожным разам свята ўсё круцейшае, а арганізатары — Цэнтр гарадскіх ініцыятыў — дапускаюць усё менш памылак: пэўна, улічваюць бясцэнны вопыт мінулых фэстаў і водгукі ў сацсетках.
Звычайна магілёўцы абураюцца: чэргі па дранікі — як па новы айфон, і чакаць даводзіцца столькі ж, што за бязладдзе. Аднак сёлета “Дранік-фэст” проста скочыў праз галаву: бульбяных бліноў можна было паесці на славу, чэргі былі чыста сімвалічныя, і чаканне займала ўсяго некалькі хвілін — якраз каб паспець запосціць фотачку ў Інстаграм (а заадно паўдзельнічаць у конкурсе #бульбасэлфi). А посціць сапраўды было што.
Па-першае, сябе ў адной са шматлiкiх фотазон: на лаўцы з пледам у барвовых тонах беларускай восені, пад аркай сярод кукурузы i гарбузоў, з моднымi хiпстарскiмi стужачкамi ці фанерным спіч-баблам.
Па-другое, сябе ці іншых удзельнікаў падчас цікавых тэматычных актыўнасцяў. У нашым персанальным топе — смешныя і кранальныя вырабы з агародніны, сімвалічнае затоптванне галоўнага ворага беларускіх палёў і агародаў — каларадскага жука — і кіданне бульбай: напэўна, у Беларусі можна было б цэлыя спаборніцтвы ладзіць. Глядзіш — з часам яны сталі б такімі ж папулярнымі, як спаборніцтвы канадскіх лесарубаў, ну а чаго не?
Па-трэцяе, культурная частка праграмы. На дранiкi атрымліваецца запрашаць сапраўды цікавыя калектывы, увесь дзень каля сцэны пад iх абавязкова хто-небудзь танчыў — усё вельмі душэўна і без кроплі алкаголю (яго адсутнасць на “Дранік-фэсце” — прынцыповая пазіцыя арганізатараў).
Пра тое, што папулярнасць мерапрыемства расце, сведчыць і колькасць стэндаў розных беларускіх кампаній i арганiзацый. Яны не проста выстаўляюць банэры і развешваюць рэкламныя расцяжкі, але і прыдумляюць конкурсы і забавы для гасцей, дораць падарункі, ну і пякуць дранікі, вядома ж. На адным са стэндаў нам прызналіся, што рыхтавацца да DranikFest-2018 пачалі яшчэ ў мінулым годзе! І трэба сказаць, у іх выдатна атрымалася.
Агульнае ж прызнанне і перамога ў конкурсе на найлепшыя дранікі сёлета — у каманды Магілёўскага дзяржаўнага ўніверсітэта харчавання, з чым іх і віншуем. У наступным годзе вангуем у іх самыя доўгія чэргі.
Іра Тонева, Марыя Гілёва
