Юбілейны год амаль скончаны, але стваральнікі покерных картаў у стылістыцы нашай першай нацыянальнай дзяржавы ўсё ж паспелі. На мінулым тыдні з друкарні забралі наклад якасных і добра ілюстраваных картаў з партрэтамі “айцоў рэспублікі”.
Ластоўскі, Кандратовіч, Мядзёлка, Балаховіч і іншыя гістарычныя персанажы з часоў БНР сталі каралямі, валетамі, дамамі і джокерамі ў ігральнай калодзе. Усе партрэты густоўна адмаляваныя ў колеры, а самі карты прыемна трымаць у руках – кардон і друк найвышэйшага гатунку! Хто і як зрабіў гэты цуд ужо “пад заслону” 100-годдзя БНР?
Калядны падарунак і “першая ластаўка” на 101-ю гадавіну БНР
Праект “Карты для гульні 100 гадоў БНР” паўстаў дзякуючы супрацы суполкі дызайнераў PRAS, выдавецтва “Тэхналогія” і каманды Pan Brat (вядомай раней па “сармацкіх цішотках”).
“Да 100-годдзя БНР мы вырашылі зрабіць нешта адметнае, – распавядае каардынатар праекту Зміцер Карабач. – Шмат было цішотак, мапаў, паштовак, налепак, а што яшчэ? Мы вырашылі – ігральныя карты. Так, год заканчваецца, але мы паспелі! Цяпер гэта і цудоўны калядны падарунак, і “першая ластаўка” да святкавання 101-й гадавіны БНР”.
Паводле Змітра, за спінай засталася немалая праца. Спачатку ідэя, якая прыйшла бізнесоўцу і мецэнату Паўлу Бераговічу. Пазней – выбар “пантэону айцоў-заснавальнікаў” – тут дапамаглі гісторык Уладзімір Ляхоўскі і выдавец Зміцер Санько. Дзякуючы мастаку Аляксею Кульбіцкаму быў створаны адзіны мастацкі стыль, а Уладзімір Арлоў зрабіў тэкставую падводку да кожнага персанажа.
Калода – гэта 52 карты непасрэдна для гульні, а таксама карткі з тлумачэннямі, хто ёсць хто. Стваральнікі паспрабавалі нават вывесці гістарычныя і лёсавыя лініі, каб раскласці ўсіх герояў па сваёй масці. Джокерамі, дарэчы, аказаліся Станіслаў Булак-Балаховіч і Макар Краўцоў: найбольш люты і непрадказальны ваяр БНР і аўтар гімна “Мы выйдзем шчыльнымі радамі”.
Не хутка, але якасна. Не танна, але статусна
“Не тое каб мы рабілі марудна, – працягвае Зміцер. – Проста спатрэбіўся час, каб зрабіць якасна. Такая дата ўсё ж раз у жыцці бывае – можам сабе дазволіць долю перфекцыянізму. У выніку атрымалася прыгожа, статусна і нятанна: усё ж такі італьянскі кардон, цудоўны друк!”
Зміцер Карабач
Карты сапраўды надрукаваныя на адмысловым картачным кардоне Burgo (Італія) з унутраным карбонавым слоем і пакрыццём Duplex Linen. Чалавеку з вуліцы гэта наўрад ці нешта скажа, але карты з такімі характарыстыкамі маюць найвышэйшую катэгорыю сярод кардонных картаў у свеце! Таму калода сапраўды статусная.
У “дурня” гуляць забараняецца!
З адваротнага боку пачка на пакупніка пазірае перакрэслены партрэт чырвонаармейца з цыгаркай у зубах (нібы з аповесцяў Пясэцкага). І гэта зусім не барацьба з курэннем, а гумар, бо побач надпіс: “У “дурня” гуляць забараняецца”. Стваральнікі рэкамендуюць гуляць гэтымі картамі ў больш шляхетныя гульні: покер, віст, прэферанс і г.д.
Камплект сярод іншага ўтрымлівае інфармацыйны буклецік пра гісторыю і ролю БНР – на ангельскай і рускай мовах. Вядома, што збіральнікі картачных калодаў ёсць па ўсім свеце, таму чым не нагода для экскурсу ў нашу гісторыю для замежнікаў?
Дзе знайсці?
Карты “100 гадоў БНР” ужо можна знайсці ў Мінску ў краме Symbal.by, у Гродне ў краме “Цудоўня”. Хутка карты будуць прадавацца і ў інтэрнэт-краме panbrat.by.
Колькі каштуе?
Агульны кошт для ўсіх крамаў будзе складаць 35 рублёў. Не прапусціце!
Алесь Кіркевіч
