Група маладых крэатыўных беларусаў сёлета з’ездзіла на фестываль “Канскія львы” — што праўда, у 2014 годзе беларуская рэкламная прадукцыя ні ў адной намінацыі не перамагла, адна уражанняў у нашых суайчыннікаў хапіла. Пра тое, як цяпер выглядае Канскі рэкламны фэст, а таксама што на ім рабіць, а без чаго можна абысціся, беларускія “маладыя львы” расказалі ўсім ахвочым у межах фестывалю AD.NAK!.
“Галоўнае, што мы зразумелі: калі вам цікава атрымаць новы досвед, то нашмат карысней хадзіць не на асноўныя лекцыі, а на воркшопы, — разважае адзін з маладых львоў Максім Горбікаў. — Галоўная выснова: у любым вашым праекце мусіць быць ідэя. Для прыкладу, бераце звычайную палку і робіце з яе музычны інструмент”.
Увогуле ўражанні ад Канаў у нашых суайчыннікаў змяшаныя — чакалі аднаго, атрымалі іншае. Заходняя рэклама працуе па іншым прынцыпе, “супрацоўніцтва”, то бок кампанія, якая займаецца рэкламай, можа мець апроч таго гатэль ці, напрыклад, стаматалагічную клініку.
“Былі там надзвычай цікавыя праекты, але па якіх крытэрах журы вызначала пераможцаў, мы не зразумелі, — кажа спадар Горбікаў. — Аднак хуткасць, з якім журы вызначае пераможцаў, шалёная. То бок калі ваш ролік не “зачапіў” за 15 секунд, шанцаў у вас няшмат”.
Галоўная праблема беларускай рэкламы — гэта няўменне яе прадаць.
“Гэтая праблема актуальная для рэкламшчыкаў па ўсім свеце, — кажуць беларускія “львы”. — У вас ёсць ідэя, яна цікавая, кліент адмаўляецца, а вы на яго не ціснеце. Напрыклад, адна з нямецкіх кампаній прапанавала рэкламную кампанію для філармоніі: горад Гамбург ператвараецца ў сцэну, музыкі рассейваюцца па горадзе, і вы можаце адсочваць, хто што грае анлайн. Філармонія доўга не пагаджалася, аднак у выніку праект “даціснулі”, і ён аказаўся паспяховым”.
Ці, іншы праект, мексіканскі, прысвечаны дабрачыннасці: людзі не хочуць кідаць у скрынкі папяровыя купюры, таму адна з кампаній прапанавала ствараць скрынкі з круглымі адтулінамі, у якія манету кінуць немагчыма: цікава, але сістэма запрацавала.
“У Канах вам сустрэнецца вялікая колькасць ідэяў, — кажа Леанід Пашкоўскі. — Напрыклад, самалёт, які працуе на сонечнай энергіі. Аднак на асноўных лекцыях у Канах інфармацыя зводзіцца да нейкай адной высновы. Калі вы трапіце на “Канскіх львоў”, то правядзіце час на воркшопах ці ў аўдыторыях Гугла — у гэтых хлопцаў заўжды ёсць чаму павучыцца”.
Юрась Ускоў, фота – Зарына Кандрацьева
