Калі вы раптам яшчэ не вызначыліся, як цікава і з карысцю правесці выходныя, мы падкажам. Гарадскі пікнік, рыцаскі фэст, дні беларускай культуры, літаратурныя імпрэзы, выставы — выбірайце мерапрыемствы на свой густ.
Фота:.firstcitiz.com
Беларусь
Мінск
На выходных мінчан кліча да сябе батанічны сад. Там праходзіць ужо добра вядомы многім гарадскі пікнік
Vulitsa Ezha.
Будзе ўсё як мае быць: амаль 50 удзельнікаў, 200+ страў і напояў Local Food Market з фермерскай экапрадукцыяй і хатнімі прысмакамі, дызайнерскі маркет з арыгінальнымі штучкамі ад рамеснікаў, фотазона з розыгрышам падарункаў, дзіцячая зона ад МАМСЛЕТ,актыўнасці і забаўкі, дыджэй-сэты і квізы, а таксама кіно.
Падрабязная праграма і квіткі тут.
Выстава традыцыйнай беларускай вышыўкі ў гістарычным музеі
На выставе можна ўбачыць неверагодныя вышываныя рушнікі, тканыя паясы з беларускім арнаментам, пакрывалы, вышытыя іконы ды іншыя рэчы, зробленыя рукамі Алены Іванаўны Дубініч, слыннай майстрыні з-пад Нясвіжа, аўтаркі кнігі «Беларускі ручнік. З мінулага ў дзень сённяшні».
Выстава будзе працаваць да 7 жніўня. Падабязнасці па спасылцы.
ĀNANDA joy festival
24 ліпеня ў арт-прасторы «Фабрыка» адбудзецца ĀNANDA joy festival, прысвечаны свядомаму і этычнаму жыццю.
У праграме — майстар-класы ды лекцыі, ёга ды музыкатэрапія, а таксама маркет этычных прадуктаў ды разнастайныя практыкі. Уваход вольны, але неабходна падпісацца на інстаграм-акаўнт фестываля. Падрабязней пра фестываль тут
23 і 24 ліпеня ў Дудутках — фэст «Наш Грунвальд»!
У праграме: рыцарскія турніры, хітовыя ды спартыўныя бугурты, рэканструкцыя эпізоду Грунвальдскай бітвы, канцэрт «Баль пасля Бітвы» з удзелам гуртоў «Хмельны вір», «KAS», «Небула», «Рокаш», шоу «Шатландская пяхота», «Пава», «Зямля легенд», «Эпідэмія», а таксама Яна Жанчака.
Будуць таксама кірмаш рамеснікаў, майстар-класы ды іншыя цікавосткі.
Падрабязная паграма і інфармацыя пра квіткі тут.
Дні беларускай культуры ў Суле
23 і 24 ліпеня заязджайце ў Сулу на Дні беларускай мовы і культуры! У праграме. дэкламацыя вершаў і паэтычныя двубоі на тэмы «Мой родны кут» і «Люблю Беларусь» з прызамі, моўныя квізы і віктарыны, спевы, танцы ды іншыя цікавосткі.
Віцебск
ART ACT! Імпрэза сучасных мастакоў
Арганізатары абяцаюць: вас чакае паглыбленне ў іншую прастору, у нечаканыя арт-працэсы, перформансы і музычны адрыў. Захоўвайце здольнасць дзівіцца,⠀ бо вы — неад’емны ўдзельнік працэсу. Адкрывайце сэрца для пражывання новага, рознага, яркага і нават незаўважнага.⠀
Глыбокае
22 і 23 ліпеня ў Глыбокім будзе Вішнёвы фэст, свята збору вішні.
Удэльнікаў фэсту чакае шмат розных цікавостак. Сярод іх: урачыстае шэсце «У гасцях у Вішні», конкурс-дэгустацыя «Варым разам вішнёвае варэнне», выстаўка «Вішнёвая мазаіка», конкурс паветраных змеяў «Вішнёвы палёт», інтэлектуальна-прыгодніцкі гарадскі квэст «PRO-вішню», пленэр, майстар-класы, сустрэчы з рамеснікамі ды іншыя мерапрыемствы.
Глядзіце падрабязную праграму фэста па спасылцы.
Гродна
«Коматаўскія пасядзелкі» пад Гародняй
24 ліпеня царква ў вёсцы Коматава, што пад Гародняй, запрашае да ўдзелу ў сямейным праекце «Коматаўскія пасядзелкі». Удзельнікаў чакае сплаў на байдарках ад Скідзеля па рацэ Котра да храму ў Коматава, пікнік ля вогнішча і духоўная бяседа.
Польшча
Варшава
23 ліпеня ў Беларускім Моладзевым Хабе музыкі Андрусь Такінданг і Аквалерыя граюць дзіцячы музычны спектакль-інтэрактыў паводле апавяданняў пра Пэтсана і Фіндуса.
Малых слухачоў чакаюць танцы, забаўкі і вясёлыя песні. Прыводзьце дзетак 3-10 гадоў і прыходзьце самі!
Лодзь
23 ліпеня фонд «Беларусы ў Лодзі» ладзіць імпрэзу «Палітзняволеная літаратура», прысвечаную літаратуры нашых палітвязняў.
Гледачоў чакаюць: форум-спектакль «Цэнзар» і сумеснае напісанне лістоў палітвязням, выкананне твораў палітзняволеных; «Феномен беларускай палітзняволенай літаратуры ў кантэксце часу і сусветнага мастацтва», канцэрт з удзелам Юрыя Стыльскага (лідар гурта «Дай дарогу!»), а таксама гурта «Разбітае Сэрца Пацана».
Імпрэза ладзіцца ў межах Дзён беларускай культуры.
Падляшша
Фэст PREKUPALLE
22-23 ліпеня на Падляшшы, у Рэспубліцы Біндзюха, адбудзецца фэст PREKUPALLE. Пастаянны лозунг фестывалю: «Музыка — Фільмы — Ежа». Наведвальнікаў чакае прэм’ера новага фільма Андрэя Кудзіненкі «Хто я?», майстар-класы па працы над сцэнарамі і акторскаму майстэрству і інш. Уваход вольны! Падрабязней па спасылцы.
Тбілісі
Арт-варкшоп «Квір-Лабірынт»
24 ліпеня Багдан Хмяльніцкі — культ- і квір-актывіст з Беларусі — запрашае разам паразважаць над квірным (у шырокім сэнсе слова) досведам жыцця ў Тбілісі ды размясціць асабістыя ўспаміны, гісторыі, пачуцці і маршруты на мапу горада.
Удзел вольны, але колькасць месцаў абмежавана, таму рэгіструйцеся па спасылцы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам». Вось, да пракладу, некалькі магчымых варыянтаў, куды варта з’ездзіць і што паглядзець:
Топ-7 помнікаў ад «Будзьма!», якія варта наведаць у Пінску
