Няўжо магілёўскія ўлады навучыліся рабіць святы для дзяцей? Ці, можа, цяпер за іх арганізацыю адказвае нейкі новы і клёвы чыноўнік? Так ці інакш, але 1 верасня на набярэжнай Дубравенкі для дзяцей правялі вельмі нядрэннае забаўляльнае мерапрыемства з назвай-дэвізам “Дзей, выдумляй, спрабуй!”.
Вядома, былі і недахопы: ужо стандартная для магілёўскіх святаў адсутнасць сметнікаў (ну проста магілёўцы вельмі культурныя людзі і не смецяць, думаюць, напэўна, у гарвыканкаме) і, нягледзячы на спякоту, амаль поўная адсутнасць у продажы пітной вады — знайсці яе быў той яшчэ квэст. У астатнім усё прайшло цалкам сабе на ўзроўні: нават палаткі з кітайскім шырспажывам, які так раздражняе дарослых і міма якога, на жаль, не могуць спакойна прайсці дзеці, стаялі недзе наводшыбе i не адцягвалі ўвагу малых ад асноўнага дзейства.
Безумоўным хітом дня ведаў сталі пажарныя разлікі. Малыя маглі ўдосталь налазіцца па машынах ратавальнікаў, паруліць, прымераць форму, каску, а потым паліць са шланга тых, хто не знайшоў пітную ваду. За дзецьмі пільна сачылі самі ратавальнiкi, расказвалі пра сваю працу, адказвалі на ўсе дзіцячыя пытанні, дапамагалі пры неабходнасці. Увогуле, не здзівімся, калі пасля гэтага 1 верасня дзеці будуць марыць працаваць у МНС. Побач, на не менш займальных інтэрактыўных пляцоўках, размясціліся супрацоўнікі ДАІ і службы ратавання на вадзе, але ім, зразумела, было складана канкураваць з выратавальнай тэхнікай.
Вялікі плюс свята — своеасаблівы кірмаш гурткоў і студый горада. Дзеці і бацькі маглі пазнаёміцца з усім спектрам афіцыйнай пазашкольнай дзейнасці, якая ёсць у Магілёве, пагутарыць з выкладчыкамі і кіраўнікамі гурткоў. Цудоўна, што ўсё гэта адбывалася ў нязмушанай атмасферы, што можна было паглядзець, што прапануе тая ці іншая студыя, параўнаць “канкурэнтаў” і выбраць сабе занятак па душы.
Дзейства адбывалася на фоне выступаў хлопцаў і дзяўчат з музычных і харэаграфічных студый горада. Таксама дзеці маглі пастраляць з лука, прымераць рыцарскія даспехі, узяць удзел у шматлікіх конкурсах і віктарынах — увогуле, кожны мог знайсці, як прабавiць час. Так што будзем спадзявацца, што ўпраўленне па адукацыі Магілёўскага гарвыканкама зможа цягам усяго навучальнага года вытрымаць высокі ўзровень, які быў зададзены ў Дзень ведаў.
Іра Тонева, Марыя Гілёва
