Калі вы раптам яшчэ не вызначыліся, як цікава і з карысцю правесці выходныя, мы падкажам. Каляды ў Мінску, батлейка і калядны кірмаш у Лондане, лялечны спектаклік «УГУ! Калядныя навіны лесу» ў Варшаве, ялінка для дзетак ва Уроцлаве, акустычны канцэрт Уладзіміра Пугача ў Берліне, майстар-класы, кінапаказы, выставы — выбірайце падзеі ў сваім горадзе і на свой густ.
Беларусь
Мінск і Мінская вобласць
KALIADY ў Мінску
У суботу, 16 снежня, у Мінску святкуюць KALIADY. Вас чакае Шчодры вечар — самая этнічная вечарына Мінска (і крыху электронная). Абяцаюць калядных дыджэяў з найлепшымі сэтамі, трошку падарункаў, калядаванне і, вядома, калядны цуд.
Заслаўе
Майстар-клас Наталлі Чэрвонцавай па выцінанцы ў Заслаўі
У нядзелю, 17 снежня, музей-запаведнік «Заслаўе» ладзіць калядны майстар-клас па выцінанцы. Падчас сустрэчы вы даведаецеся пра традыцыю беларускай выцінанкі і, пад кіраўніцтвам майстрыні, зробіце сваю ўласную выцінанку — калядную маску Казы, Мядзведзя, Дзеда.
Гомель
Майстар-клас па сожскай скані ў Гомелі
У суботу, 16 снежня, філіял Веткаўскага музея паўтарае ўнікальны майстар-клас па сожскай скані, які дужа ўпадабалі гамяльчане!
Гэтым разам вы зможаце стварыць непаўторныя завушнічкі! Дапаможа вам майстар Міхаіл Лізагуб.
Вялікабрытанія
Лондан
Батлейка і калядны кірмаш у Лондане
У суботу, 16 снежня, у беларускай царкве Лондана ладзяць батлейку!
Традыцыйна батлейку Скарынаўскай бібліятэкі адкрываюць штогод, калі набліжаюцца Каляды.
На адзін вечар чароўныя батлеечныя лялькі пераязджаюць у суседні Marian House і ажываюць у руках нязменнага батлейшчыка Паўла Шаўцова.
У калекцыі 16 лялек, якія ўвасабляюць персанажаў традыцыйнай беларускай батлейкі: тры Каралі, цар Ірад, Ваяка, Каза, Анёл, Рахіль, Смерць і іншыя.
Лялькі былі створаныя беларускай мастачкай Аленай Ткачовай і прыехалі з Беларусі ў Брытанію ў 2004 г.
Калі вы жадаеце, каб вашыя дзеці падчас батлейкі атрымалі падарунак ад Святога Міколы, то перадайце гэты падарунак (коштам да 10 фунтаў) з пазначаным імем дзіцяці батлейшчыку Паўлу Шаўцову перад прадстаўленнем.
Пасля батлейкі адбудзецца служба ў царкве і ўсе ўдзельнікі запрашаюцца на гарбату ў Мар’ян Гаўз.
Германія
Берлін
Акустычны Уладзімір Пугач у Берліне
У суботу, 16 снежня, лідар «морсаў» Уладзімір Пугач разам з гітарыстам Сяргеем Шчурко грае ў Берліне канцэрт. Любімыя песні і асаблівая, цёплая атмасфера канцэрта перанясуць вас у родныя мясціны да любімых людзей.
Літва
Вільня
Прэзентацыя альманаха па культурнай спадчыне «CTRL+S» у Вільні
У суботу, 16 снежня, у Цэнтры беларускай супольнасці і культуры прэзентуюць штогадовы альманах па культурнай спадчыне «CTRL+S», прысвечаны сёлета тэме «Утопіі нашай спадчыны».
Аўтары і героі альманаха — даследчыкі, міжнародныя эксперты, а таксама студэнты ЕГУ — разважаюць над гістарычнымі ідэаламі захавання культурнай спадчыны, а таксама спрабуюць паглядзець у будучыню захавання і адчуць выклікі, якія яна нясе.
Назва альманаха «CTRL+S» — кампутарная каманда «захаваць» — гэта спроба вырвацца за межы сэнсавых клішэ, знайсці новую мову для працы з культурнай спадчынай, якая не ігнаруе рэальнасць XXI стагоддзя.
Каляды ў Вільні
У нядзелю, 17 снежня, у Цэнтры беларускай супольнасці і культуры святкуюць Каляды. Апранайцеся ў традыцыйным беларускім стылі (вышываныя кашулі, вышыванкі, іншая вопратка ў беларускім стылі) ці прыходзьце ў калядных касцюмах — казы, мядзьведзя, зайца, ваўка, бусла, жорава, каня, быка і г.д. Ці проста апранайцеся святочна.
Цягам усяго мерапрыемства дзеці (і дарослыя) за ўдзел у святочных імпрэзах і гульнях будуць атрымліваць калядныя прызы.
Польшча
Варшава
Лялечны спектаклік «УГУ! Калядныя навіны лесу» ў Варшаве (4+)
У суботу, 16 снежня, у Музеі Вольнай Беларусі — навагодняя ялінка і лялечны спектаклік для дзетак «УГУ! Калядныя навіны лесу».
У лесе адбываюцца незвычайныя падзеі: па начах нехта палохае ўсіх звяроў.
Адважная карэспандэнтка Вавёрка бярэцца даследаваць сітуацыю і зрабіць найвыбітнейшы рэпартаж!
Вас чакае казка пра тое, як важна ўсім разумець адзін аднаго і не толькі.
Уроцлаў
Ялінка для дзетак ва Уроцлаве
У суботу, 16 снежня, Суполка Беларусаў Уроцлава і гурт «Летапіс» запрашаюць на традыцыйную ялінку для дзетак.
Прыходзьце сустрэцца з традыцыйнымі каляднымі героямі, паспяваць, патанчыць і, вядома, атрымаць падарункі!
Сёлета да віншаванняў далучыцца з выступам танцавальны калектыў «Mały Wrocław».
Чэхія
Прага
Каляды ў Празе
У суботу, 16 снежня, суполка «Золак» запрашае ўсіх незалежна ад полу, узросту і нацыянальнасці адсвяткаваць Каляды па-беларуску.
Вас чакае:
варштат па вырабу каляднай зоркі;
сумесныя спевы калядак;
прэзентацыя калядных традыцый;
традыцыйныя танцы;
прадстаўленне лялечнага театру.
Больш беларускіх падзей шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
