Калі вы раптам яшчэ не вызначыліся, як цікава і з карысцю правесці выходныя, мы падкажам. Варштат па ляльках-вяснянках у Мінску, свята млынара ў Азярцы, пешаходны квэст у Брэсце, экскурсія па-беларуску і беларускі стэнд на кніжным кірмашы ў Беластоку, майстар-клас-дэгустацыя халадніка ў Вільні, канцэрт Вайцюшкевіча ў Варшаве, вялікі беларускі вечар у Фрайбургу, канцэрты, выставы, спектаклі — выбірайце падзеі ў сваім горадзе і на свой густ.
Беларусь
Мінск і Мінская вобласць
Варштат па ляльках-вяснянках у Мінску
У суботу, 20 красавіка, у музеі Якуба Коласа — майстар-клас па традыцыйных ляльках-вяснянках.
Такія лялькі рабілі нашыя продкі для таго, каб як найхутчэй прыйшла цёплая, сталая вясна.
Вядзе варштат кіраўніца суполкі «У гасцях у Лялькі» Эрыка Грышчанка і яе памочнікі.
Свята млынара ў Азярцы
У суботу, 20 красавіка, у музеі народнай архітэктуры і побыту ў Азярцы — «Свята млынара».
Млын — пабудова для размолу зерня. З ім звязваецца шэраг павер’яў.
Лічылася, што млынары маюць стасункі з нячыстай сілай. Іх паважалі як вельмі моцных чараўнікоў і лічылася, што ўдзень малолі зерне людзі, а ўначы — чэрці.
Валадары ветракоў, каб зноў выклікаць вецер, для прыкладу, кідалі некалькі жменяў мукі, што было своеасаблівай ахвярай ветру.
А на Барысаўшчыне, тыя, хто працавалі на вадзяных млынах, у дзень святога Марціна елі гусей і казалі: «Марцін святы — губіцель гагаты».
Святочнае шэсце да млына з в. Даматканавічы;
Млынарскія чароўныя казкі;
Абрады, якія накіраваны на добрую працу млына;
Экскурсія па млыну з вёскі Даматканавічы.
Брэст
Квэст «Кварталы» ў Брэсце
У суботу, 20 красавіка, 4roomclub кліча на пешаходны квэст «Кварталы».
Абяцаюць новы фармат!
Вас чакае 4 узроўні па 10 заданняў рознай ступені складанасці. Квэст рэалізаваны праз аўтаматычную гульнявую сістэму.
Германія
Фрайбург
120 хвілін для Беларусі: вялікі беларускі вечар у Фрайбургу
У суботу, 20 красавіка, у Фрайбургу адбудзецца вялікі беларускі вечар «120 хвілін для Беларусі».
У праграме:
Лявон Вольскі з песнямі розных гадоў
размова з прафесарам Гайнрыхам Кіршбаўмам
паэтычны выступ Юлі Цімафеевай і размова з аўтаркай
размова з актывісткай аб’яднання «Разам» Інай Валіцкай
гутарка з Альгердам Бахарэвічам і чытанні «Сабак Эўропы» ў нямецкім перакладзе.
Мадэратар — Інга Пэтц.
Літва
Вільня
Майстар-клас-дэгустацыя халадніка ў Вільні
У суботу, 20 красавіка, у Цэнтры беларускай культуры і супольнасці дакрануцца да святога — тут будзе майстар-клас-дэгустацыя «Лепшы халаднік ці лепшы халаднік — вось у чым пытанне!».
А калі лепшы — дык які?
Паспрабуюць разабрацца разам:
параўнаюць некалькі рэцэптаў халадніку;
пакаштуюць і мо вырашаць, з чым яго лепш есці;
абмяркуюць, адкуль узялася такая страва.
Майстар-клас «Кветкі замест бомб» у Вільні
У нядзелю, 21 красавіка, у Цэнтры беларускай культуры і супольнасці — майстар-клас па партызанскім садаводстве «Кветкі замест бомб», які ладзіцца сумесна з актывістамі «Экадому».
Можна будзе стварыць так званыя «бомбачкі», або шарыкі з зямлі, гліны ды насення палявых кветак, якія зазвычай закідваюць на пустыры, каб пасля дажджу яны прараслі.
Партызанскае садаводства ўзнікла як форма пратэсту і спосаб вяртання сабе права ўплываць на аблічча гарадоў і зямлі. Гэтае жаданне вядома ўсім беларусам і беларускам, правы (і ў тым ліку экаправы) каторых спрабуюць выдраць з коранем.
Пасля выбуху на ЧАЭС мы ўжо бачылі масавую вымушаную міграцыю людзей з роднай зямлі, з забруджаных тэрыторый, небяспечных па сённяшні дзень.
То прыходзьце апусціць рукі ў зямлю, гліну ды насенне, каб стварыць тое, што наадварот дапаможа зямлі заквітнець.
Нідэрланды
Света Бень у Амстэрдаме
У суботу, 20 красавіка, Света Бень дае ў Амстэрдаме адразу тры выступы. Па-першае, спадарыня Света зайграе спектакль для ўсёй сям’і «Беспрацоўнае дрэва».
Будзе два паказы — у 14.15 і ў 16.30!
Запрашаюцца дзеці ад 5 гадоў і добра выхаваныя дарослыя.
Гэта гісторыя дрэва, якое змушана пакінуць парк, дзе ўсё сваё жыццё прапрацавала... дрэвам. Яго чакае дарога, напоўненая прыгодамі — то цудоўнымі, то небяспечнымі, а то і абсалютна нечаканымі.
У гэтым монаспектаклі выкарыстоўваюцца тэатральныя лялькі і аб’екты, створаныя берлінскай мастачкай Лінай Хесінай.
Гісторыю прыдумала, расказвае і паказвае актрыса і рэжысёрка Света Бень.
Па-другое, увечары таго ж дня, 20 красавіка, Света Бень грае ўтульны і аптымістычны вясновы кватэрнік «Камета не прыляцела».
Польшча
Беласток
Экскурсія па-беларуску па Беластоку
У суботу, 20 красавіка, беларусаў Беластока клічуць на беларускамоўную экскурсію па раёне Баяры.
Клічуць паглядзець:
помнікі архітэктуры мадэрнізму (гарадская лазня, будынак духоўнай семінарыі);
найстарэйшы дом з канца ХІХ стагоддзя;
традыцыйны расклад вуліц з захаванай, хоць і часткова, драўлянай забудовай;
падляшскую гарадскую драўляную архітэктуру і брукаванку;
самы незвычайны помнік Юзафу Пілсудскаму!
Беларускі стэнд на кніжным кірмашы ў Беластоку
Па 21 красавіка, у Беластоку — кніжны кірмаш і літаратурны фестываль «На памежжы».
На ім будуць і стэнды беларускіх выдавецкіх ініцыятыў: кнігарні «Кнігаўка», выданні фонда Kamunikat, выдавецтва «Янушкевіч», Vesna Books, Gutenberg Publisher, «Пфляўмбаўм», Skaryna Press, «Мяне няма».
Акрамя выставы-продажу чакаюцца і іншыя актыўнасці. Валянціна Аксак і Уладзімір Арлоў будуць падпісваць свае кнігі.
З беларускімі пісьменнікамі можна будзе сустрэцца 20 красавіка з 12 да 13 гадзіны ў «Арт-зоне» (Strefa Sztuki), якую ладзіць Падляшскі аўкцыённы дом.
Варшава
Вясновы Вайцюшкевіч у Варшаве
У суботу, 20 красавіка, у Варшаве грае вясновы канцэрт непераўзыдзены і найсціплейшы Зміцер Вайцюшкевіч.
Рыхтуе новыя і даўно знаёмыя песні.
Сяброўская атмасфера, смачнае піва і таварыства любімага артыста — усё, чаго вам не хапала гэтай вясной.
Больш беларускіх падзей шукайце ў нашай АФІШЫ.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
