"У вас калі-небудзь была прыгожая-прыгожая ваза з егіпецкім узорам? А Святлана Сямёнаўна, выкладчыца пачатковых класаў, такую акурат мела".
Так пачынаецца дзіцячы спектакль "Ці добра быць суслікам?" Васіля Дранько-Майсюка, які культурніцкая кампанія "Будзьма беларусамі" прэзентавала 18 чэрвеня ў камп'ютарнай акадэміі "Шаг".
Таццяна Печанко
"Наша сустрэча прысвечаная важнай і цікавай тэме, — кажа каардынатар кампаніі Таццяна Печанко, звяртаючыся да дзяцей і іх бацькоў, што сабраліся на прэм'еру. — Вы хіба траплялі ў сітуацыю, калі вам хацелася, каб людзі навокал больш улічвалі вашы інтарэсы? Але ва ўсіх нас ёсць свае інтарэсы, і гаворка сёння пойдзе пра правы чалавека".
Кампанія "Будзьма беларусамі!" нядаўна запусціла новы праект "Маё права", прысвечаны правам дзяцей і падлеткаў. Менавіта ў межах гэтага праекта і адбылася прэзентацыя "Ці добра быць суслікам?".
“Вандроўка ў дзівосны сад”. Летні фэст для дзяцей і не толькі – 29 чэрвеня
Патлумачыць самым маленькім гледачам, што такое правы і як не варта дзяліць людзей, вельмі проста: падзяліць дзяцей на дзве групы хоць па прынцыпе "хлопчыкі направа, дзяўчынкі налева", хоць па наяўнасці дома коціка і пасля спытаць: "Ці мае магчымасць адна група нешта забараніць іншай?" Дзеці, адчуваючы магчымую несправядлівасць, адкажуць, што ніякіх адрозненняў у прадстаўнікоў абедзвюх груп няма.
Ганна Харланчук-Южакова і Васіль Дранько-Майсюк
Спектакль "Ці добра быць суслікам?" — гэта інтэрактыўная дзея, у якую паступова ўключаюцца ўсе гледачы: Васіль Дранько-Майсюк і Ганна Харланчук-Южакова трымаюцца на імправізаванай сцэне як шоўмэны найвышэйшага гатунку — калі ўлічыць, што з дзіцячай аўдыторыяй працаваць заўжды складаней. Здаецца, няма такога моманту, які мог бы выбіць артыстаў з каляіны.
"Суслік" — гэта такая сабе прыгодніцкая драма з ператварэннямі дзяцей у азначаных жывёлак, а таксама вандроўкамі ў Егіпет і назад. Але паспрабуем абысціся без спойлераў.
Як спектакль датычны да правоў дзяцей? Наўпрост. Адна з ліній — гэта ператварэнне настаўніцы Святланы Сямёнаўны з дыктатара для малодшых класаў у чалавека, які шчыра любіць дзяцей. Дарэчы, дзеці, як паказвае практыка, на пытанне "Чаму першакласнікі маглі баяцца Святланы Сямёнаўны?" ніколі не адказваюць "бо яны яе паважаюць", гэта часцей пачуеш ад бацькоў, што даказвае: спектакль хоць і дзіцячы, а дарослым паглядзець яго таксама будзе карысна.
Напрыканцы імпрэзы ўсе маленькія гледачы атрымалі ў падарунак размалёўку "Ян, Яніна, Васіліна: правы чалавека і дзіцяці ў малюнках". Гэта яркая маляванка з сучаснымі вясёлымі карцінкамі, якая даступнай дзецям мовай тлумачыць сур'ёзныя рэчы.
Грамадская культурніцкая кампанія “Будзьма беларусамі!” выказвае падзяку камп'ютарнай акадэміі "Шаг" за прадастаўленне памяшкання для правядзення спектакля.
Мікалай Левертаў, budzma.by
Фота – Аляксандр Любянчук
Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!
