Грамадская ініцыятыва па ахове магіл беларускіх дзеячаў у Беластоку заклікае далучыцца да збору на захаванне магіл выбітных беларусаў у Беластоку. На краўдфандынгавай платформе Gronka адкрыты збор для падтрымкі ініцыятывы.

Беласток заўсёды быў важным цэнтрам беларускай культуры ў Польшчы. Тут, на могілках Усіх Святых, спачываюць дзеячы, якія прысвяцілі сваё жыццё захаванню беларускай мовы, традыцый і ідэнтычнасці. Аднак кожныя 20 гадоў патрэбна аплата за ўтрыманне магіл. Калі гэтага не зрабіць, яны могуць быць аддадзены пад новыя пахаванні.

«Мы заклікаем вас далучыцца да гэтай ініцыятывы і дапамагчы захаваць нашу гісторыю. Разам мы можам зберагчы беларускую памяць для будучых пакаленняў!» —  пішуць арганізатары збору.

Чаму гэта важна?

Магілы на могілках Усіх Святых — больш чым пахаванні. Гэта частка беларускай нацыянальнай гісторыі. Тут пахаваны людзі, якія прысвяцілі сваё жыццё служэнню беларускай мове і традыцыйнай культуры:

Кастусь Кіслы — заснавальнік хораў у Беларускім школьным таварыстве

Лявон і Сяргей Богушы — актыўныя ўдзельнікі беларускага нацыянальнага руху, чыё жыццё было прысвечана барацьбе за незалежнасць і захаванне культуры

Мікалай Чарнецкі — педагог, удзельнік беларускага нацыянальнага падполля

Захаваць гэтыя магілы — значыць захаваць сімвалы беларускай духоўнасці, гісторыі і культуры.

Хто арганізуе збор?

Грамадская ініцыятыва па ахове магіл беларускіх дзеячаў у Беластоку

Аўтар: Аляксей Трубкін, краязнаўца і экскурсавод, збіральнік архіўнай інфармацыі пра беларусаў Падляшша.

Каардынатар: Вольга Сямашка, некрапаліст, магістр у сферы аховы спадчыны, каардынатар двух паспяховых краўдфандынгавых праектаў.

Партнёр праекта — Хаб «Новая Зямля» — прадстаўляе эксклюзіўныя падарункі, якія адлюстроўваюць культурную спадчыну беларусаў Падляшша.

 Партнёр праекта — Фундацыя «Тутака» — таксама падрыхтаваў падарункі для ўдзельнікаў і спонсараў як сімвал аб’яднання беларусаў Падляшша і Беларусі ў захаванні супольнай спадчыны з 2020 года.

Як паўдзельнічаць у зборы?

Мэта збору: 11 200 злотых (2 650 еўра).

Сабраныя сродкі будуць накіраваны на:

• аплату запазычанасці па арэндзе і працяг яе для месцаў пахаванняў на наступныя 20 гадоў (да 2045 года);
• догляд тэрыторыі могілак і помнікаў;
• захаванне памяці аб дзеячах, якія пакінулі значны след у гісторыі Беларусі.

Арганізатары гарантуюць празрыстасць і дакументальную справаздачнасць усіх сабраных сродкаў.

Адпаведна кожны спонсар атрымае магчымасць удзельнічаць у экскурсіі-сустрэчы з арганізатарамі праекта, каб даведацца больш пра захаванне спадчыны на могілках Беластока, электронны ліст (сертыфікат) з падзякай і кароткай справаздачай аб праекце, а таксама, па жаданні, імянную згадку ў спісе падзяк, апублікаваным на сайце праекта ці ў сацыяльных сетках.

Падтрымаць збор можна на платформе gronka.org па спасылцы.