— Гарачы фэст — гэта як “Дранiк-фэст”, толькі без дранікаў і з глінтвейнам, — распавядае ўдзельніца свята Ганна. — Ды і людзей менш, і, трэба сказаць, так значна ўтульней.
Людзей на “гарачым фэсце”, які адбыўся 27 студзеня на этна-хутары “Зялёны гай” у Магілёве, было сапраўды значна менш, чым звычайна бывае на гарадскіх святах. Арганізатары (магілёўскі “Цэнтр гарадскіх ініцыятыў” і аб’яднанне “Шчыра майстэрня”) прызнаюцца: пабаяліся, што калі людзей прыйдзе зашмат, то чэргі знішчаць усю атмасферу, і нават адкрылі папярэднюю рэгістрацыю ўдзельнікаў. Тым не менш пра фэст трубілі ўсе сацсеткi, так што, будзем лічыць, усе ахвочыя прабавіць утульны суботні вечар за зімовымі забавамі пад куфлік глінтвейну на свята ўсё-такі трапілі.
Гасцей сустракаў беларускі Дзед Мароз Зюзя. Сфатаграфаваўшыся з ім, мiнакi ішлі ўдзельнічаць у зімовых забавах, катацца на санках, смакаваць беларускую ежу (печаныя яблыкі, бліны з салам і, вядома ж, шашлык), піць гарачыя грог ці глінтвейн. Нягледзячы на тое, што глінтвейн каштаваў 1 р. за шклянку, п’яных зусім не было: людзі ішлі дзеля свята, а алкаголь проста стаў прыемным дадаткам. Ну а тых, хто да алкаголю абыякавы, бясплатна частавалі смачнай гарбатай.
Знайсці сабе забаву па душы змог кожны: акрамя вулічных конкурсаў можна было ўзяць удзел у майстар-класах ад магілёўскіх рамеснікаў, паслухаць народных выканаўцаў, паглядзець кіно, павадзіць карагоды і проста выдатна прабавіць час з сябрамі і сям’ёй.
— Такіх мерапрыемстваў вельмі не хапае нашаму гораду, — лічыць адна з аўтарак праекта, журналістка Аліна Скрабунова. — Мне здаецца, “Гарачы фэст” мог бы стаць выдатнай альтэрнатывай афіцыйным святам.
Iра Тонева, Марыя Гілёва
