На гэтых выходных беларусы ў розных краінах свету будуць гукаць вясну. Таксама будуць беларускія канцэрты, цікавыя выставы і лекцыі, экскурсіі ды творчыя сустрэчы. Ёсць з чаго выбраць!
Беларусь
Гомель
Гуканне вясны
У суботу, 1 красавіка, філіял Веткаўскага музея кліча гукаць вясну.
Абяцаюць, што будзе весела, шумна, са спевамі, гульнямі, карагодамі, танцамі! Дапаможа гукаць вясну фальклорны гурт «Стаўбунскія вячоркі» з вёскі Стаўбун Веткаўскага раёна.
Брэст
Птушыная лекцыя
У суботу, 1 красавіка, у брэсцкім краязнаўчым музеі — экалагічная субота і новая файная арніталагічная лекцыя у межах Міжнароднага тыдня птушачак.
Вы даведаецеся пра звычайную туркаўку — птушку года Беларусі; пра самыя незвычайныя птушыныя гнёзды; пра тое, як правільна будаваць дамкі для птушак, а таксама пабачыце выставу птушыных гняздзечак ды возьмеце ўдзел у конкурсах.
Гродна
Прыгожыя і стылёвыя: экскурсія па жаночай Гародні
У суботу, 1 красавіка, музей гісторыі рэлігіі ладзіць шпацыр па жаночай Гародні канца XIX — пачатку ХХ стагоддзя. Чаму жанчынам забаранялі насіць капелюшы? Ці праўда, што Эліза Ажэшка любіла коцікаў? Прыходзьце, каб даведацца процьму цікавостак!
Польшча
Варшава
Дзіцячая праграма «Чароўны край»
У суботу, 1 красавіка, у Беларускім Моладзевым Хабе распачынаецца цыкл дзіцячых праграм «Чароўны край» з музыкамі Сержуком Доўгушавым і Андрэем Еўдакімавым.
Абяцаюць аўтарскія праграмы на аснове народных традыцый і фальклору ў сачасным аздабленні.
Удзельнікаў чакае знаёмства з унікальнымі музычнымі інструментамі, інтэрактыўныя гульні, супольныя спевы і танцы. Прагучаць і некаторыя творы з репертуару гурта Vuraj.
Беласток
Гуканне вясны з ASTROŪNA
У нядзелю, 2 красавіка, прыходзьце гукаць вясну разам з менскім фольк-гуртом «ASTROŪNA».
«Гукнем вясну разам, як гэта рабілі сотні год таму на Случчыне, уявім, як Юр’я перамагае цмока ў Верхнядзвінску, закруцім велікодны карагод ля Бездзежа, пашукаем сляды русалак у чарнобыльскай зоне, разбярэмся, хто такія валачобнікі з-пад Докшыцаў!» запрашаюць арганізатары.
Кракаў
Прэзентацыя кнігі Віктара Сямашкі «Аўтар мае рацыю заўжды»
У суботу, 1 красавіка, завітайце на творчую сустрэчу з музыкам ды паэтам Віктарам Сямашкам.
У праграме:
аўтарская меларэцытацыя з фартэпіянным акампанементам;
аповед пра Кракаў у перадгісторыі беларускага джазу;
колькі слоўцаў пра гурт «Fantastic Swimmers»;
аўтограф-сесія.
Лодзь
Творчая сустрэча з перакладчыкамі Ганнай Янкутай і Ігарам Крэбсам
У нядзелю, 2 красавіка, у Лодзі адбудзецца творчая сустрэча з перакладчыкамі Ганнай Янкутай і Ігарам Крэбсам.
Спадар Ігар прадставіць перакладзеныя ім новыя выданні з серыі «Гебраістыка Беларусі», якія нядаўна выйшлі ў Мінску: «Старая новая зямля» Тэадора Герцля і «Габрэйскія мелодыі» Генрыха Гайнэ.
А спадарыня Ганна пачытае са свайго (эка)паэтычнага праекта "Геалогія"/"Канстытуцыя«, які асэнсоўвае беларускія падзеі 2020 года праз прызму галоўнага беларускага закона.
Латвія, Рыга
Першы занятак «Мовы Нанова»
У суботу, 1 красавіка, абавязкова завітайце на першы занятак рыжскай «Мовы Нанова»! Госця — беларуская мастачка Вольга Якубоўская, аўтарка тых самых коцікаў свабоды.
Абяцаюць вясёлы інтэрактыў і нават дужа файны сюрпрыз.
Літва, Вільня
1 красавіка, Ініцыятыва «Розныя — роўныя» ладзіць вечарыну ў межах Тыдня за роўнасць і інклюзію для Беларусі. Будуць танцаваць і размаўляць, стукаць абцасамі і кружыць спадніцамі, а таксама абдымацца і падтрымліваць сваёй прысутнасцю палітвязынак і, вядома, адно аднаго.
Чэхія
Гуканне вясны пад Прагай
Гукаць будуць па-сапраўднаму, са спевамі ды карагодамі, з самаробнымі птушачкамі, якія вы створыце ўласнаруч адмыслова для абраду падчас майстар-класа.
ЗША, Маямі
Творчы вечар Змітра Вайцюшкевіча
У нядзелю, 2 красавіка, у Халандэйле каля Маямі — творчы вечар Змітра Вайцюшкевіча ў фармаце сяброўскай сустрэчы з любiмымi песнямi! Можна будзе пагутарыць з музыкам, паспяваць разам, сфатаграфавацца ды падняць разам келіх віна за Беларусь.
Грузія, Тбілісі
Паэтычная вечарына Аляксандра Ждановіча
У нядзелю, 2 сакавіка, наш даражэнькі Алесь Ждановіч, ён жа Маляваныч, запрашае на паэтычную вечарыну па творах беларускіх аўтараў «Вось яны, а вось мы».
Больш беларускіх падзеяў шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка
«Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
А па гэтай спасылцы можна знайсці афішу бясплатных мерапрыемстваў.Больш беларускіх падзеяў шукайце ў нашай Афішы.
