Беларускі горад Мсціслаў стане ўдзельнікам сумеснага праекта Еўрапейскага саюза і Савета Еўропы “Удзел грамадства ў аднаўленні гістарычных гарадоў” (COMUS). Аб гэтым карэспандэнту БЕЛТА паведаміла начальнік аддзела па ахове гісторыка-культурнай спадчыны ўпраўлення па ахове гісторыка-культурнай спадчыны Міністэрства культуры Беларусі Наталля Хвір.
Прэзентацыя гістарычнага горада адбудзецца на ўстановачным пасяджэнні II праграмы Еўрапейскага саюза ў сферы культуры “Усходняга партнёрства”, арганізаваным пры тэхнічнай падтрымцы Брытанскага савета і грамадскай праграмы Савета Еўропы “Арыентаваныя на супольнасці гарадскія стратэгіі ў гістарычных гарадах”, што пройдзе ў Тбілісі 17-18 верасня.
Удзельнікамі сумеснага праекта Еўрапейскага саюза і Савета Еўропы з’яўляюцца 6 краін: Беларусь, Украіна, Малдова, Азербайджан, Арменія, Грузія. Кожная краіна вызначыла гістарычны горад, які стане пляцоўкай для сустрэч экспертаў, арганізацыі семінараў, майстар-класаў замежных спецыялістаў. На пасяджэнні ў сталіцы Грузіі запланаваны прэзентацыі шасці гарадоў краін – удзельніц праекта.
Праект арыентаваны на рэвіталізацыю гістарычных гарадоў з прыцягненнем маштабных інвестыцый як унутры краіны, так і за яе межамі. Яго задача – прапанаваць нейкі інструмент мясцовай супольнасці ў пытанні аховы гісторыка-культурнай спадчыны, навучыць выкарыстоўваць існуючую гісторыка-культурную спадчыну на тэрыторыі гістарычнага цэнтра і атрымліваць выгаду ад яе выкарыстанне, расказала Наталля Хвір.
У праекце COMUS для Беларусі найбольш прывабным і актуальным з’яўляецца яго накіраванасць на вырашэнне практычных задач інтэграцыі культурнай і прыроднай спадчыны ў сацыяльнае і эканамічнае жыццё малых і сярэдніх гістарычных гарадоў, прыцягненне мясцовых жыхароў для выпрацоўкі агульнага будучага развіцця іх месц пражывання. Далучыўшыся да праекта COMUS, Беларусь пацвярджае сваю гатоўнасць прытрымлівацца канкрэтных мэт і метадалогіі COMUS, якія супадаюць з нацыянальнымі прыярытэтамі ў сферы аховы гісторыка-культурнай спадчыны і ўстойлівага сацыяльна-эканамічнага развіцця гістарычных гарадоў.
У Тбілісі адбудзецца падпісанне прадстаўнікамі культурных ведамстваў краін мемарандума аб далучэнні да праекта.
