У Бараўлянах у пачатку кастрычніка стартаваў праект “Марафон шчодрасці”: мясцовыя жыхары робяць падарункі адзінокім сталым людзям і збіраюць рэчы для шматдзетных сем’яў. Нядаўна прынеслі такую гару рэчаў, што арганізатары перабіралі і сартавалі іх 7 гадзін! Ініцыятарка акцыі, дырэктарка прыватнай установы “Цэнтр вольнага часу дарослых і дзяцей “ЭкаЖыццё” Аксана Бярнацкая, распавяла budzma.by, як атрымалася наладзіць такую талаку, дала парады тым, хто хоча нечага падобнага ў сваёй супольнасці, а таксама запрасіла ўсіх неабыякавых узяць удзел у гэтым марафоне.
— Ідэя марафону нарадзілася з простага чалавечага назірання за суседзямі, — гаворыць Аксана. — Многія людзі сёння пытаюцца, у які дзіцячы дом аддаць рэчы, якой дабрачыннай арганізацыі дапамагчы. Але для пачатку можна проста агледзецца і прапанаваць дапамогу сваім суседзям. Паглядзіце на дзіцячую пляцоўку, можа, там знаёмы хлопчык у вятроўцы, а на дварэ ўжо халодная восень, або суседка-бабуля стаіць побач у краме і лічыць капейкі малака купіць. Навошта далёка хадзіць? Дапамажыце ім. Таму мы свой марафон і назвалі “Свае для сваіх”. Гэта нашае традыцыйнае добрасуседства, тая самая талака. Калі мы будзем з адкрытым сэрцам і вачыма глядзець вакол сябе, заўсёды знойдзем, каму і як дапамагчы.
На тэрыторыі нашага сельсавета, напрыклад, пражывае больш за сто зусім адзінокіх пенсіянераў. Таму летась напярэдадні Новага года я кінула кліч аб марафоне шчодрасці, каб людзі прыносілі ў наш офіс рэчы, сувеніры, цукеркі. Жыхары адгукнуліся, мы сфармавалі падарункі і разам з дзецьмі пайшлі па кватэрах адзінокіх пажылых людзей. Яны былі вельмі кранутыя! Таму мы вырашылі, што ўжо не пакінем гэтых людзей і ў наступным годзе зладзім такі ж марафон. Потым мы даведаліся, што ў нашым сельсавеце пражываюць шматдзетныя сем’і, ёсць нават асобны дом у вёсцы Копішча, дзе жывуць такія сем’і. Мы вырашылі дапамагчы і ім — абвясцілі збор падарункаў. 11 кастрычніка сабралі столькі, што сартавалі з 9 раніцы да чатырох вечара. І людзі працягваюць несці.
Другая і трэцяя частка марафону шчодрасці пройдзе 27 і 28 кастрычніка.
27 кастрычніка ў нашым клубе з 11.00 да 14.00 адбудзецца дабрачынная выстава-кірмаш рамеснікаў, школьнікаў і наведніц нашай творчай майстэрні. Будзем прадаваць нашыя вырабы, і 10 % ад выручкі пойдзе на падарункі дзецям і адзінокім пажылым людзям.
28 кастрычніка адправімся ў вёску Копішча, каб дапамагчы шматдзетным сем’ям Бараўлянскага сельскага савета.
А ў снежні мы павіншуем са святамі нашых пажылых.
На гэтую ініцыятыву адгукнуліся не толькі жыхары, сёлета нас яшчэ падтрымалі дзве арганізацыі: крама “Умняшка” зрабіла свой унёсак, а фірма “БелВіАн” падарыла 47 кг мармеладу.
Парады
Тым, хто хацеў бы рэалізаваць падобныя ініцыятывы ў сваёй супольнасці, Аксана дала слушныя парады:
- Лепш пачынаць збор рэчаў за 2-3 месяцы да моманту раздачы падарункаў.
- Неабходна стварыць некалькі валанцёрскіх атрадаў з дарослых і дзяцей для развозу падарункаў, каб гэта не звальвалася толькі на арганізатараў.
- Прыцягвайце да гэтых ініцыятываў школьнікаў. Хтосьці разам з вамі раздасць падарункі, хтосьці іх зробіць сам на ўроках працы ці дома.
- Супрацоўнічайце з мясцовымі ўладамі. У выканкамах ці сельсаветах вам могуць даць спісы людзей, якім патрэбная дапамога, параяць, да каго прыйсці ў першую чаргу.
- Актыўна карыстайцеся групамі ў сацыяльных сетках для распаўсюду інфармацыі аб ініцыятывах мясцовай супольнасці, кааперуйцеся з ужо існымі актыўнымі групамі.
— Часта людзі пытаюцца ў мяне, як дапамагчы, каб чалавек прыняў гэта як шчыры дар, а не як падачку, — працягвае Аксана. — Я ў такіх выпадках кажу людзям: “Дзякуй, што далі мне магчымасць дапамагчы вам”. Тварыць дабро і дапамагаць іншым — натуральная патрэба чалавека. Нават той, хто сам у бядзе, выпроствае плечы, калі разумее, што можа дапамагчы таму, каму горш. Я гэта бачу на ўласных прыкладах. У нашай установе мы адкрылі інклюзіўны крэатыўны Клуб “Бараўлянская талака”. Сюды разам з усімі прыходзяць і бацькі, якія выхоўваюць дзяцей з інваліднасцю, самі дзеці. І неяк за чарговай творчай працай я распавяла такім мамам пра тое, што ў нас жыве шмат адзінокіх людзей і што было б выдатна падтрымаць іх увагай, таму што адзінота — страшная рэч. І адна мама раптам праслязілася і сказала, што ўсё жыццё адчувала сябе абдзеленай, а тут можа сама камусьці дапамагчы. Гэта мяняе погляд на жыццё. Таму мы і дзякуем тым, хто прымае нашу дапамогу.
КААРДЫНАТЫ
Тыя, хто хацеў бы далучыцца да Марафону шчодрасці, які працягнецца да снежня, могуць звяртацца ў “ЭкаЖыццё ” па адрасе: вул. 40 гадоў Перамогі, дом 34, Бараўляны.
+375 (29) 122-00-69
Старонкі ў сацыяльных сетках Вконтакте i Facebook.
Ганна Кручкова
Фота Зарыны Кандрацьевай
Праект “ЭкоЖизнь” стаў адным з фіналістаў курса Biz4all-2, які паспяхова ажыццяўляецца ў межах праграмы “Інкубатар сацыяльнага прадпрымальніцтва”. Арганізатарм гэтай праграмы з’яўляецца ОДБ Брусель (Бельгія) у партнёрстве з TNU Network University (Нідэрланды) і пры фінансавай падтрымцы Еўрасаюза (больш падрабязна глядзіце на biz4all.eu).
