Вернікі за ўласныя грошы набылі абраз, каб уратаваць яго, і высветлілі, што ён мае незвычайныя асаблівасці, піша katolik.life.
У Хрысціянскім сацыяльным цэнтры ў Мінску прадстаўлены старадаўні абраз Найсвяцейшай Панны Марыі з Езусам на руках. На адваротным баку ўзгадваецца, што ён «святы і цудатворны». Адшукаць і ўратаваць гэтую святыню ўдалося двум рупліўцам, вернікам Паўлу Каралёву і Юрыю Кудзеліну. Яны, уклаўшы свае ўласныя сродкі, змаглі набыць абраз і змясціць яго ў каталіцкай установе.
Твор уяўляе сабой Божую Маці Адзігітрыю, ён зроблены алеем на палатне і мае незвычайныя асаблівасці. У пачатку ХХ стагоддзя, падчас аднаўленчых прац, яго часткова закрылі лінолеўмам, які пакінуў пасля сябе сляды, а калі быў зняты, на палатне адкрылася мноства маляваных кветак.
Да таго ж, больш раннія лікі Багародзіцы і Хрыста на абразе былі выяўленыя дзякуючы спецыяльнаму рэнтгену. Згадка пра цудатворны абраз ускосна пацвярджаецца наяўнасцю каронаў на палатне і на шатах. Таксама на шатах маецца надпіс з 1775 года, што муж і жонка Сіман і Брыгіда Сіневічы з Дарэўскіх Вярыгаў ахвяравалі гэтыя шаты на абраз. Гэта азначае, што час стварэння шатаў дасягае XVIII стагоддзя, а сам гэты рэлігійны твор, верагодна, яшчэ старэйшы.
Цяпер неабходна тэрмінова правесці рэстаўрацыю абраза, каб надаць яму адпаведны выгляд. Таксама неабходны рэстаўрацыйныя працы з шатамі.
Рэквізіты:
РА «Дабрачынная Місія Добрага Самараніна пад заступніцтвам Святой Уршулі Лядухоўскай»
Юрыдычны адрас: 220030, г. Мінск, вул. Рэвалюцыйная, д. 1а, к. 7
УНП 102366022, АКПА 380087195000
р/рахунак BY63UNBS30151611900000001933
ЗАТ «БСБ Банк», БІК UNBSBY2X,
пл. Свабоды, 4, 220030, г. Мінск
Увага. Абавязкова пазначайце ў пераводзе, што гэта добраахвотнае ахвяраванне на рэстаўрацыю іконы.