Беларускі дождж, відаць, паважае сучаснае мастацтва, бо зрабіў у сваім графіку нечаканы перапынак, саступіўшы месца мастакам, якія на ўсё лета і частку восені “акупавалі” востраў Камсамольцаў на Камсамольскім возеры.
Агляд опэн-эйра “Арт-астравы”, прысвечанага 950-годдзю Мінска, пачынаецца з дзіцячых арэляў, якія Альфа-банк, адзін з арганізатараў выставы, усталяваў ля рэчкі. Пакуль дзеці гойдаюцца, дарослыя робяць сэлфі на фоне залатога і срэбнага вершнікаў – герояў інсталяцыі “Бітва на Нямізе” Паўла Вайніцкага і Вадзіма Мацкевіча. Аб’ект інтэрактыўны: можна прайсці паміж супраціўнымі бакамі, а можна захаваць нейтралітэт і паназіраць збоку.
Аматары прыродных матэрыялаў Васіль Цімашоў і Паліна Пірагова прадставілі сваю новую “прыродную” працу – “Лакатар”, сплецены з лазы. Па словах аўтараў, канструкцыя прызначаная для рэлаксацыі і сузірання прыроды.
Скульптары Анатоль і Іван Арцімовічы імправізуюць на тэму кахання. Іх героі – Ён і Яна, якія, абняўшыся, ўтвараюць планету. “Няма большага абагульнення ў разуменні месца чалавецтва на зямлі, чым планета Кахання, – разважаюць аўтары. – На гэтым пачуцці трымаецца свет, вагаецца ў далікатнай раўнавазе”.
Дзяніс Трапашка вынайшаў новыя “Формы жыцця” – пяціметровыя фігуры, якія “растуць” з зямлі і імкнуцца да аблокаў; Аляксандр Сакалоў праз скульптуру заклікае да самааналізу, а гаражане Уладзіслава Стальмахова – людзі ў футарале. Дарэчы, гэта яшчэ адна гісторыя кахання, дзе сустракаюцца ён і яна, адбываецца выбліск, сэрцы пачынаюць стукаць у аднолькавым рытме, закаханыя робяцца адным цэлым і нібыта ляцяць над зямлёй.
Усім, хто хаця б трошкі сумуе па сваім дзяцінстве, раім звярнуць увагу на кампазіцыю Жанны Марозавай і Алены Чэпелевай. Гэта тры вялізныя студні з бетону: зверху шкло, знізу люстэрка, а паміж імі розныя рэчы, прысыпаныя пяском – тыя самыя “сакрэцікі”, толькі не мы сталі дарослымі, а, наадварот, стала вялікай пясочніца. Каб канчаткова адчуць сябе маленькім, трэба падзьмуць на гіганцкі пластмасавы дзьмухавец Таццяны Гомзы.
Пасля чаго можна і да велізарнага “Кубка” Андрэя Шыловіча. Гэты арт-аб’ект – пажаданне радасці і дабрабыту ўсім мінчукам. Побач з кубкам – гіганцкія акуляры. У рэальнасці яны драўляныя, але хто ведае, можа для некага і ружовыя, праз шкло якіх бачна толькі добрае.
Дарэчы, сёлета “Арт-астравы” прымаюць гасцей з Нямеччыны. Гурт берлінскіх мастакоў Tape That працуе ў тэхніцы тэйп-арт – ствараюць інсталяцыі пры дапамозе скотчу. Майстар-клас на свежым паветры творцы правялі і для гасцей опэн-эйра.
“Арт-астравы” праходзяць па ініцыятыве Альфа-банка і Нацыянальнага цэнтра сучасных мастацтваў пры падтрымцы Міністэрства культуры і Мінгарвыканкама. Экспазіцыю можна наведаць да сярэдзіны верасня ў парку на Камсамольскім возеры.
Глядзіце таксама:
Кася Кірпацік
Фота Зарыны Кандрацьевай
