Распачаўся прыём заявак у Школу сацыяльнага прадпрымальніцтва “Good Impact”. Пра тое, што гэта такое і як трапіць, распавядаем у матэрыяле.
Вам хочацца несці дабро ў гэты свет: дапамагаць хворым, удзяляць увагу сталым і дзецям, змагацца з экалагічнымі праблемамі і ратаваць беспрытульных жывёл… Але ж дома – сям’я, трэба плаціць за камуналку ды і самому нешта есці. Вось і даводзіцца штодня ісці на не вельмі любімую працу, траціць свой час і жыццёвыя сілы на тое, чым не хочацца займацца. А яшчэ хочацца развівацца, расці як асобе і спецыялісту, займацца творчасцю, сустракацца з аднадумцамі і проста цікавымі людзьмі… Вось і даводзіцца рэалізоўваць свой “чалавечны” патэнцыял у вольны час. Але адкуль вольны час у чалавека ХХІ стагоддзя?
У нашым грамадстве склалася думка, што дабрачынная дзейнасць не прыносіць прыбытку і можа існаваць толькі за кошт спонсараў. Так, гэта адзін з механізмаў суіснавання жорсткага свету бізнесу са сваімі часам бесчалавечнымі законамі, і свету душэўнасці і чалавечнасці: бізнес зарабляе грошы любымі спосабамі, частку з іх ахвяруе на сацыяльныя праекты ці дабрачынныя акцыі. Але механізм гэты няўстойлівы, і дабрачыннасць тут выступае ў якасці “прыжывалкі”, лёс якой цалкам залежыць ад дабрабыту, а то і проста ад настрою “гаспадара”.
Вось і даводзіцца разрывацца паміж “трэба” і “хачу”. Але выйсце ёсць заўсёды! Для тых, хто шчыра хоча працаваць, каб змяніць свет да лепшага і пры гэтым быць фінансава незалежным, у верасні 2019 года стартуе школа сацыяльнага прадпрымальніцтва “Good Impact”. Сацыяльнае прадпрымальніцтва – тое, што дазваляе “дабру” стаць самаакупным і ўстойлівым, тое, што дазволіць вам зарабляць сабе на жыццё любімай справай і аказваць рэальную дапамогу тым, каму яна сапраўды патрэбная.
“Социальное предпринимательство – дело не каждого человека. Оно требует особой мотивации, особых подходов”, – даводзіць Людміла Корбут, кіраўнік праектнай групы “Coopforum International” (Берлін). Спадарыня Людміла завітала на прэзентацыю Школы сацыяльнага прадпрымальніцтва “Good Impact”, якая 31 ліпеня адбылася ў Мінску, каб распавесці ўсім зацікаўленым пра гэты праект. А таксама пра тое, як працуе сацыяльны бізнес у Германіі і чаму гэта іннавацыйная дзейнасць. “Good Impact” – не першы праект па развіцці сацыяльна адказнага бізнесу, які рэалізуецца ў Беларусі пры падтрымцы Федэральнага міністэрства замежных справаў Германіі ў межах праграмы “Развіццё супрацы з грамадствам краін Усходняй Еўропы і Расіі”.
На прэзентацыі сабраліся ўдзельніцы і ўдзельнікі папярэдніх праграм, якія паспяхова засвоілі методыкі сацыяльнага прадпрымальніцтва і рэалізоўваюць свае праекты: “Я приеду”, “Адукацыя Фэст”, “Ценный капитал”, “Центр активного долголетия” і інш. Кожная з гэтых ініцыятыў намагаецца дапамагчы грамадству справіцца з праблемамі: зрабіць больш камфортным жыццё людзей з інваліднасцю, напоўніць сэнсам і новымі фарбамі жыццё на пенсіі, стварыць бяспечную і псіхалагічна камфортную пляцоўку для дзяцей з асаблівасцямі… І пры гэтым праекты ганарацца не толькі сваёй чалавечнасцю, але і дэманструюць неблагія эканамічныя паказчыкі.
Як дабрачыннасць умацоўвае салідарнасць у грамадстве
Першым штуршком да такой дзейнасці ў многіх сталі ўласныя жыццёвыя абставіны (напрыклад, нарадзілася дзіця з асаблівымі патрэбамі альбо хтосьці з блізкіх трапіў у алкагольную залежнасць). Некаторыя пайшлі ў сацыяльнае прадпрымальніцтва таму, што не змаглі прайсці міма чужога болю. Так, напрыклад, Эльвіра Каралёва (сацыяльнае прадпрыемства “Я приеду”) распавядае:
“Всё началось с поста в facebook. Молодой человек-колясочник просил людей, чтобы погуляли с ним”.
Таксама спадарыня Эльвіра дзеліцца: “Бывают периоды отчаяния. Хочется всё бросить. Сказать своим ребятам: давайте я пойду на обычную работу, а вы будете спокойно сидеть дома, как раньше”.
Эльвіра Каралёва
Так, сацыяльны бізнес вымагае шмат энергіі, часу і эмацыйных укладанняў, але яно таго вартае. У гэтым упэўненыя ўсе ўдзельнікі. “Это как зайти в холодную воду, главное – сделать первый шаг”, – кажа кіраўніца ўстановы дадатковай адукацыі дарослых “Адукацыя Фэст” Таццяна Пімкова.
І шмат-шмат захапляльных і кранальных гісторый чуецца ад маладых бізнесоўцаў.
Людміла Корбут распавядае, што ўвогуле сацыяльнае прадпрымальніцтва існуе з ХІХ стагоддзя, але трэндам яно стала адносна нядаўна. Дзякуючы яму ў Германіі цяпер існуе шмат цікавых прадпрыемстваў, некаторыя з іх знакамітыя не толькі на радзіме. Auticon, Discovery Hands, Quartiermeister, Querstadteinі інш. Гэта працоўныя месцы для людзей з аўтызмам, якія вельмі таленавітыя ў IT-сферы, гэта дыягностыка раку звышадчувальнымі пальцамі людзей, якія не бачаць, гэта экскурсіі па Берліне, якія праводзяць… людзі, што жывуць на вуліцы, бо не маюць жытла, гэта вытворчасць піва, з дапамогай якой вырашаюцца праблемы мясцовай грамады…
Людміла Корбут
У нашай краіне такіх праектаў пакуль зусім мала – нават адмысловага заканадаўства яшчэ няма. Але такі кірунак з’яўляецца (і нават прагучала, што рыхтуецца законапраект па сацыяльным прадпрымальніцтве).
Таму калі вы адчуваеце, што хочаце мяняць свет да лепшага, вырашаць сацыяльныя праблемы, якіх, на жаль, у нас багата, спяшайцеся запісацца ў Школу сацыяльнага прадпрымальніцтва “Good Impact” – заяўку можна падаць да 11 жніўня 2019 года. Праграма навучання складаецца з дзвюх частак: семінары і практыкумы ад спецыялістаў (у тым ліку з-за мяжы) і ментарская падтрымка вашага праекта. Навучанне бясплатнае. Але яно будзе вымагаць вашага часу і дзейнасці – проста “пасядзець паслухаць” не атрымаецца. Гэта школа для тых, хто прагне дзейнічаць.
Заяўку можа падаць любы чалавек, які хоча займацца сацыяльным прадпрымальніцтвам, з Гомеля і Гомельскай вобласці, Гродна і Гродзенскай вобласці, Мінска і Мінскай вобласці. Кампетэнтнае журы на конкурснай аснове адбярэ па 20 навучэнцаў з кожнага рэгіёна. Па заканчэнні праграмы ў вас будзе ўнікальная магчымасць атрымаць “залаты медаль” – фінансавую падтрымку на рэалізацыю вашай ідэі.
Падрабязна пра праграму можна прачытаць тут.
Падаць заяўку на ўдзел можна тут.
Па ўсіх пытаннях можна звязацца з каардынатарамі праекта:
Аксана Шаўчэнка (Гомель і Гомельская вобласць)
+375296810745
Сацыяльнае прадпрыемства "Метеорит Плюс"
Лана Руднік (Гродна і Гродзенская вобласць)
+375292847799
Установа "Цэнтр дадатковай адукацыі дарослых "Студия полезных компетенций"
Аксана Бярнацкая (Мінск і Мінская вобласць)
+375291220069
Установа "Центр досуга взрослых и детей "ЭкоЖизнь"
Фота - Алесь Любянчук
