Калі вы раптам яшчэ не вызначыліся, як цікава і з карысцю правесці выходныя, мы падкажам. 700-годдзе горада Ліда, Дзень беларускага пісьменства ў Гарадку, Фэст навукі ў Мінску, а яшчэ канцэрты, кінапаказы, выставы — выбірайце мерапрыемствы ў сваім горадзе і на свой густ!
Беларусь
Мінск
У суботу, 2 вреасня, у Батанічным садзе пройдзе фэст навукі!
Гэта буде дзень лекцый, майстар-класаў ды іншых навуковых актыўнасцяў, каб з асалодай паглыбіцца ў свет навукі і дзеткам, і дарослым.
Тут вы ўбачыце, як навука ўплывае на масавую культуру, і як масавая культура прапануе навуцы шляхі для развіцця. Будуць навуковыя арт-аб’екты, аўтарскі квэст па фестывалю, дэгустаторый і прыемныя падарункі за актыўнасць.
Гомель
У суботу, 2 верасня, Мікола Косміч грае ў Гомелі ўтульны канцэрт.
Будуць песні пад акустыку, шмат размоў, лампавая атмасфера і цёплая сустрэча.
Музыка выканае свае вядомыя песні, пазнаёміць з новымі кампазіцыямі (сваімі і не толькі), крыху распавядзе пра новы альбом, над якім зараз працуе, і зробіць суботні вечар святам добрай беларускай музыкі.
Віцебская вобласць
Дзень беларускага пісьменства ў Гарадку
Гэтымі выходнымі, 2 і 3 верасня, у Гарадку — Дзень беларускага пісьменства. Вось трошку цікавостак з праграмы.
2 верасня
11.00-22.00 — ФЕСТЫВАЛЬ КНІГІ І ПРЭСЫ
12.00-18.00 — Рэспубліканская навукова-практычная канферэнцыя «Гарадоцкія чытанні»
11.00-20.00 — Фестываль народнай творчасці, паэзіі і фальклору «Гарадоцкі Парнас»Акцыя «Чытаем паэму „Тарас на Парнасе“ разам...»;
11.00-20.00 — Выстава «Героі беларускай міфалогіі» (мастак В.Слаук, скульптар А.Шпіца) (Гарадоцкі раённы краязнаўчы музей, вул Вароўскага, 3).
3 верасня
11.00-15.00 — Кулінарны фестываль «Мара гурмана» (гарадскі сквер, вул Савецкая):
14.00-15.00 — ЗАКРЫЦЦЁ XXХ ДНЯ БЕЛАРУСКАГА ПІСЬМЕНСТВА. Перадача вымпела гораду—сталіцы Дня беларускага пісьменства 2024 года.
Гродзенская вобласць
Ліда святкуе народзіны: фэст LIDBEER, рыцарскі турнір і танцы
У суботу, 2 верасня, у Лідзе — процьма івэнтаў, а найгалоўнейшы — 700-годдзе горада.
Па-першае, немагчыма будзе абмінуць фэст LIDBEER, бо ён будзе паўсюль. На трох сцэнах — каля палаца культуры, Лідскага замка ды дома гандлю — будзе адпаведна поп-рок, электра і фольк.
А яшчэ будуць фудкорты і фэст феерверкаў.
Польшча
Беласток
Паказ фільма «На Чорных Лядах»
У нядзелю, 3 верасня, у Беластоку — новы кінасеанс па-беларуску. Гэтым разам глядзяць фільм Валерыя Панамарова «На Чорных Лядах» паводле Васіля Быкава.
Канец Слуцкага паўстання 1920 года. Некалькі беларускіх паўстанцаў ідуць лясамі, спрабуючы сысці ад бальшавікоў, але неўзабаве разумеюць, што цалкам акружаны. Яны даведаюцца, што чырвоныя забіваюць палонных, а іх целы возяць па вёсках для апазнання. Сваякоў затым таксама расстрэльваюць ці рэпрэсуюць. Каб гэтага не дапусціць, паўстанцы прымаюць рашэнне ўчыніць у глухім месцы групавое самагубства. Самаму малодшаму з іх даручана пахаваць целы, ён застаецца ў жывых.
Варшава
Бясплатная экскурсія і квэст для дзяцей і іх бацькоў у Каралеўскіх Лазенках у Варшаве
У нядзелю, 3 верасня, Школа Цэнтра Беларускай Салідарнасці запрашае на беларускамоўную экскурсію і квэст для дзяцей і іх бацькоў у парк Каралеўскія лазенкі.
Вас чакае гульня-квэст «Карона караля Стаха» па матывах беларускай гісторыі і літаратуры, а таксама легендаў са ўсяго свету. Удзельнікі падзеляцца на каманды, і на працягу квэста ім будзе дапамагаць дзённік караля Стаха.
Спадзяемся, вы разгадаеце сакрэты і галаваломкі, знойдзеце схаваную карону і супакоіце дух караля!
Германія
Берлін
Паказы фільма «Motherland» у Берліне
У Берліне пачынаюцца паказы дакументальнага фільма Ганны Бадзякі і Аляксандра Міхалковіча «Motherland», у якім беларускія пратэсты разглядаюцца скрозь прызму сістэмнага гвалту ў беларускай арміі і — глыбей — у беларускім грамадстве.
Сеансы праходзяць штодня з 31 жніўня па 8 верасня ў кінатэатры «Krokodil»
Літва
Вільня
Выстава Кацярыны Пікірэні «Вязьмо»
Добрая нагода завітаць у Віленскі беларускі музей імя Івана Луцкевіча — там працягваецца экспазіцыя праекта «Вязьмо», які даследуе эстэтычны і містычны складнікі беларускіх літар і спрабуе намацаць мяжу, на якой знак пачынае перарастаць у абстрактны ўзор.
Графічны эксперымент прысвечаны трывожнай сувязі з бабулямі, наймагутнейшымі полюсамі радаводаў. «Вязьмо» не толькі пра любоў і памяць, але таксама пра сузалежнасць, разгубленасць і супярэчлівы досвед. Аднак найперш — пра гаючую сілу ўчаснага вандалізма, бо памяць немагчыма зберагчы, не параніўшы яе.
Англія
Лондан
Свята зубра і Вялікага Княства Літоўскага ў Лондане
У суботу, 2 верасня, у беларускай бібліятэцы імя Францішка Скарыны — свята зубра і Вялікага Княства Літоўскага ў гонар 500-годдзя выдання ў Кракаве славутай «Песні пра зубра» Міколы Гусоўскага.
Прыходзьце паслухаць чытанні з паэмы, пабачыць выявы зуброў і скарбы часоў ВКЛ з калекцыі Скарынаўкі і пакаштаваць стравы, натхнёныя гістарычнымі рэцэптамі з «Літоўскай кухаркі»! Апранайцеся, па жаданні, у элементы гістарычных строяў ВКЛ — шляхецкіх ці народных, каб лепш адчуць атмасферу свята.
Латвія
Рыга
У суботу, 2 верасня, Макс Корж вязе ў Рыгу свой нахабна-шчыры вайб.
«Мова Нанова» ў Рызе распачынае новы сезон
У суботу, 2 верасня, рыжская «Мова Нанова» адкрывае новы сезон!
Прыходзьце святкаваць пачатак ды абмяркоўваць усё, што за лета прачыталі ды паглядзелі. І вывучаць новыя слоўцы па тэме «Адзенне» — з яе пачнуць.
Грузія
Тбілісі
Супольны канцэрт гуртоў Teleport і PyLai ў Тбілісі
У нядзелю, 3 верасня, у Тбілісі грабць супольны канцэрт гурты «Teleport» і «PyLai».
Абяцаюць рознажанравыя кампазіцыі на стыку любоўнай лірыкі, палітыкі і меланхалічнай рэфлексіі — песні з запісанвх альбомаў ды новыя кампазіцыі.
Больш беларускіх падзей шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў. Больш беларускіх падзей шукайце ў нашай Афішы.
