19 лютага пры поўным аншлагу ў кнігарні “ЛогвінаЎ” прайшла прэзентацыя аўдыёдыска “Дзінь-дзілінь: пара гуляць у казкі”. Адмыслова да імпрэзы ў Мінск прыехаў сам аўтар казак Сяргей Вітушка, які ад пачатку 90-х жыве ў Вільні. Сваімі ўражаннямі ад гэтага цікавага праекту дзяліліся яго ўдзельнікі, а за музычнае аздабленне адказваў гурт “Палац”, а дакладней, яго лідар Алег Хаменка.
- Сяргей Вітушка
Дыск “Дзінь-дзілінь: пара гуляць у казкі” можна разглядаць як аўдыёпрацяг кнігі казак Сяргея Вітушкі з той жа назвай. Кнігу і дыск сваімі ілюстрацыямі аздобіў Міхал Анемпадыстаў, а выданне стала магчымым дзякуючы сябрам і паплечнікам аўтара, якія вырашылі падтрымаць пісьменніка ў няпросты для яго час (Сяргей праз хваробу страціў зрок і магчымасць хадзіць, але працягвае ствараць). За выданне аўдыёкнігі паводле казак Вітушкі ўзяліся Радыё Рацыя ды інтэрнэт-партал Tuzin.FM, а ўдзел у запісе ўзялі вядомыя асобы. “Трэк-ліст праекту ўражвае, і мне вельмі прыемна і пачэсна знаходзіцца сярод такіх імёнаў”, – зазначыў Алег Хаменка.
- Павал Касцюкевіч
Акрамя яго ў запісе дыска ўзялі ўдзел Лявон Вольскі, Зміцер Вайцюшкевіч, Уладзімір Арлоў, Андрэй Хадановіч, Зінаіда Бандарэнка, Ганна Хітрык, Стэфан Эрыксан, Тамара Лісіцкая, Адам Глобус, Алесь Камоцкі, Сяргей Харэўскі, Сяржук Сокалаў-Воюш. Не ўсе яны здолелі прыйсці ў гэты дзень, ды і наўрад ці кнігарня змясціла б усіх удзельнікаў праекту разам з гледачамі.
- Адам Глобус
На мінскую прэзентацыю з Вільні прыехаў і сам аўтар – Сяргей Вітушка. Як зазначыў вядоўца імпрэзы Сяргей Харэўскі, атмасфера моцна нагадала яму 80-я, якраз той час, калі Вітушка разам з паплечнікамі разгарнуў актыўную дзейнасць і ачольваў клуб “Талака”. “Як і 20 гадоў таму, цікавая і годная праца была зробленая беларускай талакой, да якой спрычыніліся дзясяткі людзей, колішніх і новых сяброў добрага казачніка”, – сказаў Сяргей Харэўскі, які разам з Сяргеем Будкіным і задумаў гэты праект.
- Сяргей Харэўскі
Як паведаміў арт-дырэктар кнігарні “ЛогвінаЎ” Павал Касцюкевіч, кніга “Дзінь-дзілінь: пара гуляць у казкі” па продажах у самой кнігарні па выніках года заняла шостае месца, а сярод дзіцячай літаратуры стала першай. Несумненна, што поспех будзе чакаць і аўдыёвыданне.
- Стэфан Эрыксан, амбасадар Швецыі ў Беларусі
Цікава, што казкі Сяргея Вітушкі яшчэ і паставілі на сцэне. Здарылася гэта ў Канадзе дзякуючы намаганням Віялеты Кавалёвай і тэатра “Яваровы людзі”. Сам жа “добры казачнік” паабяцаў: “Будуць новыя казкі”. І ўжо праанасаваў адну з найбліжэйшых літаратурных задумаў – кніжку ў дарожку “Тэатр на далонях”.
- Алег Хаменка
Пасля прамоваў Адама Глобуса і Стэфана Эрыксана ды спеваў Алега Хаменкі імпрэза падышла да канца, але гледачы яшчэ доўга не адпускалі аўтара “Дзінь-дзілінь”, які яшчэ з гадзіну размаўляў з чытачамі, ціснуў рукі гасцям і ўдзельнікам ды раздаваў аўтографы.
Мікалай Дубавіцкі, Аляксандр Ждановіч
