У нядзелю ў рамках праекта “Маё права” прайшоў дабрачынны майстар-клас па стварэнні тактыльнай кнігі. Удзельнікі сустрэчы ўпершыню ў Беларусі рабілі кнігу на роднай мове для дзетак з праблемамі зроку — “Як мышка Пік-Пік заблукала” па аднайменнай казцы Людмілы Рублеўскай.
“У Беларусі існуе вялікая праблема з літаратурай, напісанай брайлем, асабліва па-беларуску. Таму мэта акцыі — паказаць, як можна дапамагаць рэалізаваць правы людзям, якія найбольш патрабуюць нашага клопату. У дадзеным выпадку — дзецям з праблемамі зроку. Яны таксама маюць права атрымліваць інфармацыю, у тым ліку на роднай мове, — адзначыла каардынатарка кампаніі “Будзьма беларусамі!” Анастасія Комлік-Ямаціна.
Анастасія Комлік-Ямаціна
Удзельнікі майстар-класа, акрамя таго што стварылі частку беларускамоўнай тактыльнай кнігі, даведаліся, як ствараюцца кнігі для тых, хто кепска бачыць альбо не бачыць зусім. А таксама вучыліся разам са спецыялісткай па брайлі Святланай Малянок набіраць тэкст шрыфтам Брайля.
Святлана Малянок і Людміла Рублеўская
“Навошта людзям з добрым зрокам вучыць брайль? Па-першае, гэта проста цікава. А яшчэ гэтыя веды могуць дапамагчы хутчэй знайсці агульную мову з людзьмі, у якіх ёсць праблемы са зрокам. Шрыфт Брайля ці мова жэстаў — гэта як замежныя мовы, яны заўсёды могуць спатрэбіцца ў жыцці”, — лічыць Святлана Малянок.
Зробленыя першыя крокі па стварэнні беларускамоўнага сінтэзатара для інвалідаў па зроку
Пісьменніца Людміла Рублеўская таксама брала ўдзел у сустрэчы.
Людміла Рублеўская
Створаная падчас майстар-класа кніга будзе перададзеная ў Маладзечанскую школу-інтэрнат №2, дзе навучаюцца дзеці з парушэннямі зроку.
Вольга Воўк (у цэнтры), стваральніца ініцыятывы “Тактыльныя кнігі”
Дабрачынны майстар-клас па стварэнні тактыльнай кнігі стаў заключнай акцыяй праекта “Маё права”.
Аляксандра Дварэцкая
Фота — Зарына Кандрацьева
Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!
