Трэці фестываль беларускамоўнай рэкламы і камунікацыі AD.NAK! завяршыў адукацыйную праграму. З 10.30 раніцы болей за сотню людзей слухалі выступы Анастасіі Залескай, Юрыя Шуста, Захара Шлiмакова, Паўла Дзядкова, Вольгі Алейнік ды Андрэя Халецкага. На вялікі жаль у апошні момант адмяніўся выступ Васіля Андрэева, і ў прызначаны для яго час ўсе жадаючыя змаглі ўзяць удзел у шалёнай інтэлектуальнай гульні “Цмокі vs Буслы”.
- Вольга Алейнік
Анастасія Залеская, вядучы спецыяліст па маркетынгу і PR праекту RABOTA.TUT.BY выступіла з прэзентацыяй «Канкурэнтны маркетолаг. Як прадаць сябе ў Беларусі». Спадарыня Залеская расказала пра структуру попыту на спецыялістаў і дынаміку вакансій у сферы маркетынгу і рэкламы, пра складнікі кошту спецыялісту у галіне і пра тое, як знайсці выдатную працу, напісаўшы выкшталцонае рэзюмэ.
Юра Шуст і Захар Шлiмакоў, дызайнеры інтэрактыўнага агенцтва Red Graphic, прадставілі прысутным свой даклад «Інтэрактыўныя людзі – інтэрактыўныя праекты», у якім падрабязна расказалі пра асаблівасці інтэрактыў-праектаў для розных пляцовак і замоўцаў. Нечаканым прагучала пытанне пра адсутнасць у партфоліа спецыялістаў падобных праектаў у друкаваных СМІ, але хто ведае, магчыма менавіта яно і натхніць дызайнераў на рэвалюцыю ў галіне друкаванай рэкламы?
- Андрэй Халецкі
.Пра непазбежную смерць традыцыйных формаў у рэкламе пераканаўча распавёў Павел Дзядкоў, крэатыўны дырэктар Студыі спецпраектаў PRKVADRAT. Свой выступ рэкламіст назваў «Мода на ўцягванне» і падчас яго добра ўцягнуў аўдыторыю ў сутнасць пытання жывымі і працуючымі прыкладамі з “перадавой” digital-маркетынгу. Расповед пра 8 п’яных таксістаў як кампанент праекту сацыяльнай рэкламы супраць п’янства прымусіў “працвярозець” тых, хто яшчэ сумняваўся ў неабходнасці і непазбежнасці крэатыўных рашэнняў у рэкламе.
У вандроўку па сучасным дызайне сваёй прэзентацыяй запрасіла ўсіх прысутных Вольга Алейнік, дырэктар агенцтва візуальных камунікацый AVC. У сваёй прэзентацыі «Эвалюцыя візуальных камунікацый» яна рассказала пра тэндэнцыі, сістэмы, сувязі, залежнасці і хісткія крытэры ацэнкі дызайну брэнду і прадукту. Добрай ілюстрацыяй да наратыву сталі лепшыя абразцы дызайну з усяго свету.
- Павел Дзядкоў
Завяршыў праграму семінараў Андрэй Халецкі, крэатыўны дырэктар рэкламнага агенцтва Forte Grey, які прадставіў праграму з правакацыйнай назвай «Не гавары мне гавару».Галоўны акцэнт выступу быў пастаўлены на стасункі мультыкультурнасці з лакальнасцю ў рэкламе і ролю беларускай мовы ў рэкламе ў Беларусі.
Добрым фінішам першай часткі дню стала інтэлектуальная гульня «Старыя-новыя сімвалы Беларусі: цмокі супраць буслоў», дзе ўсе жадаючыя змаглі выказацца і паспрачацца пра сімвалы нашай краіны. Галоўнай высновай спрэчкі стала агульная згода ў тым, што новы культурніцкі код Беларусі мусіць стварацца ў спалучэнні новага і старога.
Алесь Плотка, фота – Зарына Кандрацьева
