Днямі ў Магілёве адбыўся ІІІ Нацыянальны форум “Музеі Беларусі”. Прадстаўнікі музеяў з усёй краіны 1 і 2 кастрычніка ладзілі ўрачыстыя і масавыя забаўляльныя мерапрыемствы для ўсіх ахвотных.
Каля 120 прадстаўніцтваў музеяў і калямузейных арганізацыяў з усёй Беларусі сабраў Магілёў у межах ІІІ Нацыянальнага форуму “Музеі Беларусі”. Адбывалася ўсё ў будынку спарткомплексу “Алімпіец”, і нягледзячы на адсутнасць шырокай рэкламнай кампаніі, ахвочых наведаць мерапрыемства было больш чым дастаткова.
Дарэчы, свята пачыналася яшчэ на падыходах да галоўнага памяшкання. На пляцоўцы перад уваходам разгарнуліся намёты рамеснікаў і кіёскі з ежай і пітвом. Ну і для дасканаласці аб’ядноўваў усё гэта канцэрт народных калектываў і дзіцячай самадзейнасці.
Што да афіцыйнай часткі, то два дні праходзілі рознага кшталту паседжанні і абмеркаванні. Былі абраныя найлепшыя музеі краіны ў розных намінацыях.
Але шырокай публіцы цікавым падалося зусім іншае, а менавіта работа галоўнай экспазіцыі форуму. Фактычна, кожны наведнік мог у адным месцы пабачыць найлепшае, што назапасілі музеі Беларусі (а такіх тут назбіралася, як казалася вышэй, амаль 120). Прычым зрабіць гэта абсалютна бязвыплатна, бо ўваход быў вольны.
А музеям сапраўды было што паказаць. Нягледзячы на тое, што на кожную экспазіцыю адводзілася некалькі квадратных метраў, музейшчыкі здолелі разгарнуцца на ўсю моц і паказаць сябе з самых выгадных бакоў. Некаторыя прывезлі са сваіх фондаў рэдкія экспанаты, многія былі не толькі апранутыя ў адпаведныя канцэпцыі сваёй арганізацыі касцюмы, але і ладзілі сапраўдныя тэатралізаваныя шоў. І дзеці, і шматлікія дарослыя, якія з такой нагоды таксама ператварыліся ў дзяцей (у найлепшым сэнсе гэтага слова), з задавальненнем мацалі зброю (ад Сярэднявечча да Другой сусветнай), разглядалі макеты замкаў і старадаўніх будынкаў, пераапраналіся і фатаграфаваліся побач з цікавымі і сапраўды па-майстэрску зробленымі інсталяцыямі. Некаторым давялося нават памахаць мячом ці прысесці на сусветна вядомы цяпер жалезны трон з папулярнай “Гульні тронаў”.
Трэба сказаць, што супрацоўнікі музеяў не саступалі сваім наведнікам у пазітыве, з задавальненнем дапамагаючы ім весяліцца. Па праходах шпацыравалі ў парадным адзенні гараджане часоў ВКЛ з музея гісторыі Магілёва. За імі кацілі па падлозе кулямёт “Максім” супрацоўнікі музея Вялікай Айчыннай вайны і г.д. Карацей, паўсюль уладарыў пазітыў.
Такім чынам, дзея атрымалася сапраўды маштабнай. Шкада толькі, што адбывалася ўсё не ў цэнтры горада, і праз адсутнасць вялікай рэкламы многія проста не ведалі, што яны страчваюць, застаўшыся дома ў гэтыя дні. Бо нягледзячы на пэўны скептыцызм у беларускім грамадстве наконт духоўнай і матэрыяльнай якасці сховішчаў тутэйшых музеяў (маўляў, гэта не Луўр, куды там), нашы музейшыкі гэтым мерапрыемствам пераканалі, хочацца спадзявацца, многіх, што ў нас ёсць чым ганарыцца. Трэба толькі пачаць цікавіцца. А вы даўно хадзілі у музей?
Арцём Іваноў
Фота: Марыя Гілёва
