Ініцыятыва “Свята ў кожнае сэрца” стала перможцам конкурсу ідэй, што быў абвешчаны ў межах кампаніі “Разам да справы”, якую вядуць “Будзьма беларусамі!” і SYMPA. Ідэя “Свята ў кожнае сэрца” належыць цудоўнай сям’і Дзмітрыя і Таццяны Ламейкаў!
У іх асяроддзі шмат прыёмных і шматдзетных сем’яў. Аднойчы муж з жонкай задаліся пытаннем: чым можна такім сем’ям дапамагчы? Паколькі яны самі такая сям’я, яны задумаліся, чаго хацелі б для сябе, чаго ім не хапае, і ўбачылі, што ў штодзённых клопатах і працы не хапае вольнага часу разам мужу і жонцы. Гэты праект — як маленькі адказ на наяўную патрэбу.
Галоўная ідэя — падарыць сем’ям свята: ператварыць звычайны працэс прыгатавання ежы ў захапляльную і цікавую падзею, а таксама навучыць дзяцей гатаваць і дапамагаць бацькам.
Раз-два на месяц яны арганізоўваюць і праводзяць дабрачынную акцыю для трох шматдзетных ці прыёмных сем’яў, падчас якой каманда — кухар, асістэнт і валанцёр — гатуюць з дзецьмі стравы беларускай кухні (асноўная страва, закуска і дэсерт), а мамы з татамі ў гэты час адпраўляюцца на спатканне: у кіно, тэатр, вандроўку па Мінску, на танцавальны майстар-клас і інш.
Ламейкі лічаць, што сям’я — гэта вялікая каштоўнасць, якую трэба падтрымліваць і дапамагаць.
Галоўныя мэты праекта:
-
Садзейнічаць умацаванню адносін паміж пакаленнямі і сем’ямі.
-
Звярнуць сэрцы бацькоў да дзяцей і сэрцы дзяцей да бацькоў.
-
Садзейнічаць у выяўленні і раскрыцці патэнцыялу ў кожнага з удзельнікаў праекта.
-
Вярнуць былую рамантыку ў адносіны паміж бацькамі.
-
Дапамагаць і падтрымліваць шматдзетныя і прыемныя сем’і.
-
Папулярызаваць нацыянальныя беларускія кулінарныя традыцыі: паказаць разнастайнасць кухні, распавесці гісторыю ўзнікнення страваў, звярнуць увагу на культуру харчавання і вярнуць любоў да беларускай кухні дарослым і дзецям..
Таццяна з Дзмітрыем мараць, што сем’і падхопяць гэту ідэю і зробяць з яе прыгожую сямейную традыцыю — калі дзеці будуць рабіць такі падарунак бацькам, і гэта будзе яшчэ больш аб’ядноўваць сем’і!
За два гады існавання яны правялі больш за 15 акцый, наведалі каля 30 сем’яў.
Кулінарныя майстар-класы праводзілі вядомыя шэф-кухары: Алена Мікульчык, Вячаслаў Гарбатаў, Андрэй Рэзнікаў, Марына Бандаровіч, Ігар Каменеў, Вераніка Галабурда.
Арганізацыю спаткання для бацькоў іх у розны час падтрымалі акторы Павал Харланчук, Ганна Хітрык, Уладзімір Глотаў, Сяргей і Вікторыя Жбанковы, студыя прыгажосці “Фабрика грёз”, студыі танца “Квартал” і “TangoTіme”, праект “Это же наша песня” (настолкі для арганізацыі спаткання).
Планы на новы сезон — з ліпеня па май правесці як мінімум 15 акцый для 25 шматдзетных, прыёмных сем’яў ці сем’яў, якія выхоўваюць асаблівых дзяцей з Мінска і Мінскага раёна.
І вось 2 ліпеня адбылася чарговая акцыя “Свята ў кожнае сэрца” для двух цудоўных сямей: Вольгі Жыбінавай і Васіля Малашанкава (5 дзяцей) і Аляксандра і Таісіі Карповіч (7 дзяцей). Гэтым разам кулінарны майстар-клас праходзіў у гасціннай краме-студыі бытавой тэхнікі “SVENTA”. Пакуль дзеці гатавалі з цудоўнай Марынай Бандаровіч (брэнд шэф-кухар Беларусі, дыетолаг, міжнародны суддзя WACS) для бацькоў смачную вячэру: чароўныя мяшочкі з фаршам, салат “Цуд” з ёгуртавай запраўкай і карысную і хуткую для прыгатаванне закуску з цукіні з сырам, мамы з татамі схадзілі ў кіно.
Расклад па часе:
сустрэча з дзецьмі у 16.30, перадача бацькам квіткоў у краме-студыі;
з 17.00 па 18.30 — гатаванне вячэры-сюрпрыза для бацькоў;
18.30 — 19.00 — упрыгожванне студыі;
19.00 — 19.45— святочная сустрэча бацькоў з кветкамі, частаванне ежай, раздача падарункаў валанцёрам.
Водгукі бацькоў: “У сваіх клопатах мы з мужам забыліся як гэта карысна і цудоўна — выходзіць куды-небудзь удваіх і якасна бавіць час! Дзякуй вам вялікі за тое, што вы робіце, хай ваш праект працягваецца, і свята прыйдзе ў кожную сям’ю!” “Вы зрабілі нам сапраўднае свята! Было весела, смачна і прыгожа! Адчувалі сябе патрэбнымі і асаблівымі, дзякуй вам вялікі!”
фота: Зарына Кандрацьева
