Міжнародны тэатральны форум “М.@rt.кантакт” пачаў сваю працу ў Магілёве. З 21 да 27 сакавіка жыхары горада змогуць паглядзець 22 спектаклі ад 21 рознага тэатра з 8 краін свету: Беларусі, Літвы, Латвіі, Польшчы, Украіны, Расіі, Казахстана і Славакіі. Тэатр з Германіі не змог прыехаць: напярэдадні трупа трапіла ў аварыю на гастролях у Аб’яднаных Арабскіх Эміратах.
“Март-кантакт” — падзея, значная не толькі для культурнага жыцця Магілёва, але і для культурнага жыцця ўсёй Беларусі: каб паглядзець і абмеркаваць спектаклі, у горад на Дняпры на тыдзень з’ехаліся тэатральныя крытыкі і журналісты з усёй краіны (i нават з замежжа!), а арганізатары кажуць, што амаль усе квіткі на спектаклі былі раскупленыя праз пяць дзён пасля таго, як паступілі ў продаж.
Таксама ў рамках форуму пройдзе майстэрня маладой рэжысуры: увесь тыдзень магілёўскія акцёры разам са студэнткай Расійскага дзяржаўнага інстытута сцэнічных мастацтваў, рэжысёрам Каміляй Хусанавай будуць рыхтаваць эскіз спектакля “Жоўты пясочак” паводле апавядання Васіля Быкава.
Фэст праходзіць ужо трынаццаты раз, і звычайна на адкрыццё Магілёўскі абласны драматычны тэатр рыхтуе што-небудзь феерычнае. Сёлета абышлося без лішняга пафасу: акцёры проста выйшлі на сцэну і павіталі гледача. Таксама магілёўцам паказалі спектакль “Калодзеж” Мангістаўскага абласнога музычна-драматычнага тэатра імя Жантурына (г. Акту, Казахстан) і спектакль “Пустота” Цвярскога ТЮГа. У 2017 годзе “Пустота” была намінаваная на расійскую нацыянальную прэмію “Залатая маска-2017”, але магілёўскі глядач пакуль не спяшаецца з ацэнкамі: магчыма, рэч у тым, што спектакль на форуме ў ліку першых, і тэатралы проста чакаюць, што яшчэ пакажа ім “М.@rt.контакт”.
Кожны год гледачы фестывалю выбіраюць найлепшы спектакль: кідаюць квіточкі ў скрынку для галасавання на ўваходзе. Сёлета выбары перамесцяцца яшчэ і ў інтэрнэт (квіточкі застануцца). Таксама найлепшы спектакль выберуць крытыкі і спецыяльнае моладзевае журы.
Пакуль жа глядач у прадчуванні свята i натхнення, якім кожны год і з’яўляецца фестываль. Ці стане 13-ы форум тым, чаго ўсе чакаюць, пакажа наступны тыдзень.
Іра Тонева, Марыя Гілёва