Чарговы прэс-клуб пра супрацу актывістаў і журналістаў прайшоў у Магілёве.
Медыя для несавецкіх людзей
Галоўны рэдактар інтэрнэт-часопіса пра Мінск CityDog.by Сяргей Сахараў стаў добрым сябрам кампаніі “Будзьма беларусамі!”. Ён удзельнічае ў кожным прэс-клубе, бо цікавіцца, як развіваецца супольнасць: грамадзянская і медыя.
Ён расказаў канцэпцыю часопіса пра мінскі лайфстайл, паказаў паспяховыя праекты “Адметныя”, “Grassroots”, прысвечаныя актыўным і адказным жыхарам Мінска.
“Такія гісторыі запатрабаваныя ў чытачоў. Яны маюць вольны час і хацелі б змяняць грамадства. Напрыклад, “Адметныя”: для бізнесу – рэклама, для нас – класныя гісторыі, для чытачоў – натхняльныя прыклады”, – патлумачыў Сяргей.
Рэдактар называе гэтую аўдыторыю крэатыўным класам. Паняцце паходзіць з эканомікі і азначае тых, хто працуе не ў наўпроставай вытворчасці прадукцыі, а ў постіндустрыяльным сектары (фатографы, дызайнеры, ІТшнікі). Хоць на пытанне з залы Сяргей Сахараў удакладніў, што CityDog лічыць сваёй публікай людзей, “якія не хочуць быць савецкімі ў самым кепскім сэнсе гэтага слова”.
“Яны ездзяць у Вільню патусіць у клубе ці на шопінг, каб прасягнуцца тым духам. Яны яшчэ не еўрапейцы ў ідэальным сэнсе гэтага слова, але да гэтага імкнуцца. Цяпер у Мінску гэта ёсць, у Магілёве – таксама, хоць і не ў такім маштабе”, – кажа Сяргей.
Калі ў Мінску пачынаецца высечка паркаў праз будаўніцтва, частка жыхароў дамагаецца грамадскіх слуханняў і часам адмены праекта. Гэта наўрад ці стала б магчымым без удзелу актывістаў: эколагі прафесійна ведаюць, куды і як трэба звяртацца. У сваю чаргу, медыі, асвятляючы гэта, пашыраюць паспяховыя натхняльныя прыклады на вялікую колькасць чытачоў і тым самым выхоўваюць сваю аўдыторыю.
Сяргей кажа, што раней яму нават у галаву не прыйшла б сістэмная ўвага да НДА, актывістаў, а сёння гэта галоўныя героі CityDog.
Тым больш што ў час новых медыяў, калі прафесія журналіста перастала быць элітарнай, многія пытанні вырашаць прасцей і нават можна прыцягнуць бізнес, бо быць актыўным стала модна.
Самыя папулярныя навіны – графікі адключэння гарачай вады
З мясцовых у якасці спікера выступаў вядучы рэдактар інтэрнэт-рэсурсу ІА “Магілёўскія ведамасці” Дзмiтрый Ляпейка.
Інфармацыйнае агенцтва лічыцца №1 у рэгіёне. Яно з’явілася ў выніку рэарганізацыі газет “Магілёўская праўда” і “Магілёўскія ведамасці”. Заснавальнік абедзвюх – аблвыканкам.
З прамовы Дзмітрыя стала ясна, што СМІ пазіцыянуе сябе выключна як нейтральнага “пражэктара”:
“Мы займаемся здабычай сырой нафты. На большае нашых кадраў не хапае. Мы паведамляем пра тое, пра што нам нехта паведаміў. Самі мы не эксперты, каб ацэньваць тую ж экалогію горада”, – патлумачыў ён.
Інфармацыйныя нагоды “Магілёўскіх ведамасцей” – планёркі ў аблвыканкаме, прэс-рэлізы, што з’яўляюцца ў рэдакцыйнай скрыні. Дзмітрый абмовіўся, што яны і самі радыя пашыраць разнастайнасць герояў, але мясцовы крэатыўны клас аказаўся не гатовы паведамляць усім пра свае поспехі:
“Неяк у Магілёве план па экспарце дапамагла выканаць адна ІТ-кантора. Але вельмі папрасіла ў публікацыі не называць іх”, – расказаў выступоўца.
Актывістам, якія ўсё ж хацелі б з’явіцца ў стужцы агенцтва, Дзмітрый Ляпейка даў каштоўныя парады. Ён расказаў, што навіны – прадукт, які хутка псуецца, і, напрыклад, самыя папулярныя публікацыі – графікі адключэння гарачай вады.
Адпаведна, актывістам варта не рэкламаваць сябе, але пазнаёміцца з профільным журналістам ды прасоўваць саму тэму.
“Важна разумець, што ўяўляе сабой СМІ, куды вы звяртаецеся. Журналісты заўжды адкрытыя для зносінаў. Шмат рэчаў не адбываецца празнеразуменне асаблівасцяў працы: у кожнага сваё ўяўленне, як мае выглядаць матэрыял. Можна стэлефанавацца альбо падысці пагаварыць наўпрост на такіх мерапрыемствах, як гэтае”, – раіць ньюсмейкерам рэдактар “Магілёўскіх ведамасцей”.
Таксама ён дадаў, што часта аўтар не цікавіцца лёсам свайго прэс-рэліза: ці ён атрыманы, ці тэма цікавая, ці хапае інфармацыі.
Як і на мінулых прэс-клубах, да спікера паступілі гарачыя пытанні пра беларускую мову ў ягоным выданні. Ён доўга адбіваўся і ўрэшце падсумаваў:
“Мы – рускамоўны рэсурс. Калі вас цікавяць навіны, мы задаволім вашую зацікаўленасць у іх. Добрых журналістаў, якія могуць якасна пісаць па-беларуску, вельмі мала”, – лічыць Дзмітрый Ляпейка.
У каментарах пісалі, што перашкаджаюць інвестыцыям
Старшыню рэгіянальнага аддзялення Таварыства беларускай мовы, экскурсавода Алега Дзьячкова, не палохае непапулярнасць беларускай мовы ў СМІ. Ягонае грамадскае аб’яднанне мае ў сябрах некалькіх журналістаў. Анонсы і фота з мерапрыемстваў яны забяспечваюць сваімі сіламі.
“У мяне няма вялікага галаўнога болю наконт гэтага. Мэтанакіравана мы нікога не запрашаем. Пару разоў тэлебачанне прыязджала на нашыя падзеі”, – распавёў актывіст.
Звычайна магілёўскае ТБМ расказвае пра сябе з дапамогай сацыяльных сетак, сваёй рассылкі на электронныя адрасы, а сталым людзям тэлефануюць адрасна.
Такім самым чынам яны дзеляцца інфармацыяй пра перапіску і перамовы з чыноўнікамі, напрыклад, пра ўшанаванне памяці Міхася Зарэцкага ў Шклове.
Хоць ТБМ скрупулёзна з мясцовай прэсай не працуе, некалькі разоў героямі гарачых тэмаў яны станавіліся.
7-8 гадоў таму інвестар “Сервалюкс” хацеў пабудаваць офісны будынак насупраць драмтэатра. Гэта гістарычны цэнтр Магілёва. Алег выпадкова даведаўся ад чыноўнікаў, што ўжо ёсць праект і “што ўсё даўно вырашана”.
Актывіст з некалькімі сябрамі дамогся правядзення першага грамадскага абмеркавання. У выніку дамову на будаўніцтва скасавалі.
“У каментарах на MyCity.by чаго толькі не пісалі пра нас: мы замінаем развівацца, супраць інвестыцый, не даем працаваць”, – згадаў Алег Дзьячкоў.
Але наступнае грамадскае абмеркаванне ўжо не прынесла такіх вынікаў. Прадпрыемства “Магніт” лепей падрыхтавалася, і актывісты прайгралі.
“Ці можа ў Магілёве з’явіцца крэатыўны клас, які будзе гэту праблему вырашаць?” – задае пытанне ў залу мадэратар Наталля Халанская.
Дырэктарка тайм-кавярні “13:87” у Бабруйску сама калісьці скончыла журфак. У сябе ў горадзе ёй удалося сабраць вакол сябе ды наладзіць узаемадзеянне паміж людзьмі творчых прафесій і актывістамі.
Дзмiтрый Ляпейка настроены скептычна, маўляў, тэхналогія “забаніць” на грамадскіх слуханнях вельмі простая. Менавіта яна мела станоўчы вынік адзін раз, але не спрацавала ў наступныя разы.
“Я спрабаваў дамовіцца з ІТшнікамі на ўзаемавыгадныя ўмовы, але пакуль без поспеху”, – падзяліўся ён.
Рэдактар інфармагенцтва таксама крытычна выказаўся наконт буйнога транснацыянальнага бізнесу ў якасці партнёраў.
“Мясцовым СМІ можна працаваць з сярэднім і дробным бізнесам”, – пракаментаваў ён прыклад праекта “Адметныя” часопіса CityDog і кампаніі Samsung.
Цэлая спрэчка разгарнулася пра выпадак, калі публікацыя ў інтэрнэце быццам бы перашкодзіла правядзенню мерапрыемства. Гарадскія актывісты аднойчы дамовіліся на тэрыторыі завода паказаць кіно пад адкрытым небам. На анонс чыноўнікі зрэагавалі рэпрэсіўна: як завод можа рабіць такое праз іх галаву. Артыкул быў зняты, а арганізатарам давялося прайсці доўгі шлях узгаднення падзеі.
Ці была тут адказнасць СМІ? У зале жартуюць, што крэатыўны клас у горадзе ёсць. Нумары ўсіх 250 чалавек ёсць у тэлефоне каардынатара кампаніі “Будзьма беларусамі!” у Магілёве Юрыя Стукалава. Навошта СМІ, калі можна патэлефанаваць наўпрост і не раздражняць улады?
Апошняя рэпліка Сяргей Сахарава, які ўважліва слухаў аргументы магілёўцаў, была трохі пафаснай і разам з тым вельмі матывавальнай:
“Прыклад Мінска кажа пра тое, што ўсё можа мяняцца. Тым больш у час, калі любы можа быць журналістам. Сайт ТБМ мае ўсе шанцы стаць СМІ. Варта зняць шоры і паверыць у ідэю”.
Хрысціна Марчук
Фота Зарыны Кадрацьевай
Глядзіце таксама:
“Журналіст vs актывіст: як выгадна суіснаваць разам”
“Нам не стае хіба толькі асабістага кантакту” — як камунікуюць журналісты і актывісты Віцебска
