Нясвіж — бадай адзін з самых вядомых і папулярных сярод айчынных і замежных турыстаў гарадоў Беларусі. Штогод яго наведваюць тысячы людзей. Галоўная турыстычная візітоўка Нясвіжа — палац Радзівілаў, а таксама прылеглы да палаца парк з маляўнічымі сажалкамі. Абавязковымі для наведвання турыстычнымі адметнасцямі з’яляюцца таксама гарадская Ратуша, Фарны касцёл, Слуцкая брама і былы кляштар бенедыктынак.
Сёлета, скарыстаўшыся першым цёплым вясновым днём, мы адкрылі турыстычны сезон. Прапануем вашай увазе невялікі агляд і фотарэпартаж.
Сапраўдны турыстычны бум у Нясвіжы пачаўся гадоў дзесяць таму, калі ў палацы Радзівілаў скончыліся рэстаўрацыйныя працы. Вядома, турыстычныя групы наведвалі Нясвіж і раней, але экскурсійная праграма без наведвання палаца была куды менш цікавая.
Палац падчас рэстаўрацыі, 2005 г.
За апошняе дзесяцігоддзе істотна змяніўся і сам горад. Хоць першыя якасныя змяненні ён перажыў крыху раней. У 1997 годзе тут адзначаўся Дзень беларускага пісьменства і друку, а годам пазней — рэспубліканскія Дажынкі. І калі да свята пісьменства мясцовыя ўлады абмежаваліся лёгкім касметычным добраўпарадкаваннем, то да Дажынак рыхтаваліся куды больш грунтоўна.
Ратуша да рэстаўрацыі
Менавіта тады мясцовая Ратуша займела свой аўтэнтычны выгляд — была адрэстаўраваная яе вежа, знішчаная пажарам у 80-я гады ХІХ стагоддзя.
Праз некалькі гадоў пачаліся рэстаўрацыйныя працы ў палацы — адтуль нарэшце з’ехаў санаторый, які знаходзіўся на балансе былой «Міжкалгасздраўніцы». Парк увайшоў у адзіную структуру — палацава-паркавы комлекс «Нясвіж». Што дазволіла нарэшце выдаткоўваць на яго абслугоўванне больш сродкаў.
З прытокам турыстаў у Нясвіжы і яго ваколіцах з’явілася некалькі аграсядзібаў, а ў палацы пачаў прымаць гасцей міні-гатэль. Па словах мясцовых жыхароў, госці з Расіі пачалі актыўна набываць жыллё і ўчасткі пад забудову. Што праўда, гэтая актыўнасць пайшла на спад пасля 2014 года.
Цікавая і камічная дэталь: адным з традыцыйных пунктаў экскурсійнай праграмы менавіта для турыстаў з Расіі было наведванне мясцовай фірмовай крамы агракамбіната «Сноў».
Што кінулася ў вочы сёлета, дык гэта амаль поўная адсутнасць турыстаў у горадзе.
На паркоўцы каля касцёла ніводнага аўтобуса. Не было заўважана і легкавікоў з расійскімі нумарамі. Відавочна, што і ў гэтым годзе ў Нясвіжы будзе не густа з турыстамі. І прычына не толькі ў эпапеі з эпідэміяй кавіду. За апошнія паўтара гады з Беларусі па сумнавядомых прычынах з’ехала шмат беларусаў з актыўнай грамадзянскай пазіцыяй. Па тых жа прычынах да нас едзе значна менш замежных турыстаў. У сувязі з апошнімі падзеямі ва Украіне не варта моцна разлічваць на наплыў гасцей з Расіі.
Для тых, хто бываў у Нясвіжы ўжо неаднойчы, наўрадці будзе цікавая стандартная экскурсійная праграма «палац Радзівілаў — Ратуша — Слуцкая брама». У апошняй, дарэчы, ужо некалькі гадоў працуе свой міні-музей. Куды цікавей зладзіць самастойную экскурсію выходнага дня, патраціўшы больш часу на няспешную прагулку па парку альбо наведванне былой урадавай калоніі, пабудаванай у 1920-я гады ў так званым закапанскім стылі.
Знаходзіцца былая калонія ва ўсходняй частцы горада — так званым Новым свеце (мясцовыя яшчэ называюць гэты раён Забрамай).
Як варыянт, можна наведаць былы кляштар бенедыктынак, на тэрыторыі якога цяпер размяшчаецца педагагічны каледж.
У бібліятэцы навучальнай установы ёсць музейная экспазіцыя, прысвечаная гісторыі настаўніцкай семінарыі, пераемнікам якой з’яўляецца каледж. Але, на жаль, з нядаўняга часу староннія наведнікі не могуць трапіць на тэрыторыю педагагічнага каледжа.
