Берасце, Горадня, Магілёў, Віцебск, Гомель — грамадская кампанія “Будзьма беларусамі!” вядомая сваімі імпрэзамі не толькі жыхарам сталіцы, але і абласных цэнтраў. За апошнія паўтара года ў межах кампаніі адбыўся шэраг новых па фармаце рэгіянальных падзеяў: афлайнавыя ток-шоу на актуальную для рэгіёна тэматыку, “кірмашы праектаў” і прэзентацыі фестывалю Ad.nak! Кампанія не першы год ладзіць па ўсёй краіне сустрэчы з паэтамі, бардамі і гісторыкамі, але сустрэчы-прэзентацыі кампаніі ў рэгіёнах актыўна ладзіць пачала нядаўна. Першым горадам сярод раённых цэнтраў сталі Бялынічы Магілёўскай вобласці.
Алесь Крыжэвіч, Юрась Несцярэнка, Алесь Агееў, Ганна Трубачова
Удзел у дыскусіі на тэму “Як зрабіць свой культурніцкі праект?” бралі прадстаўнікі розных прафесій і з розных мясцовасцяў. Абмеркаваць рэаліі і падзяліцца досведам спецыяльна прыехалі з Магілёва Алесь Агееў — дацэнт Магілёўскага ўніверсітэта імя Куляшова, былы дэпутат гарсавета, і Алесь Крыжэвіч — старшыня студэнцкага этнаграфічнага таварыства. Пра свой досвед расказвалі таксама Юрась Несцярэнка — паэт, бард, грамадскі дзеяч з Бялыніч, і Ганна Трубачова, журналіст з Мінска, якая апавяла пра праекты кампаніі “Захапленні” і “Фестываль Цмока”.
У вітальным слове каардынатар кампаніі “Будзьма беларусамі!” Ніна Шыдлоўская павітала прысутных і падзякавала ўсім, хто ў гэты вечар аддаў перавагу гэтай сустрэчы. Спадарыня Шыдлоўская расказала пра слоган, пад якім з нядаўняга часу дзейнічае кампанія, — “Культура паляпшае жыццё!” і тыя акцыі, што ўжо прайшлі ў рэгіёнах і яшчэ маюць адбыцца. Былі згаданыя самыя свежыя і блізкія падзеі, напрыклад, рэалізаваная пасля “Кірмашу праектаў” акцыя “Палатно гісторыі ў стылі графіці” ў Магілёве і адкрыты конкурс праектаў, які ладзіўся кампаніяй. “Хацелася б бачыць болей праектаў і ад гарадоў невялікіх, бо, сустракаючы людзей, мы чуем шмат вельмі добрых ідэяў, і нашая задача — паспрыяць іх ажыццяўленню”, — зазначыла яна ў канцы. А каб пабачыць, якія праекты былі б актуальнымі для Бялынічаў і маглі быць зладжаныя ў межах кампаніі, і распачалася далейшая дыскусія.
каардынатар кампаніі “Будзьма беларусамі!” Ніна Шыдлоўская
Тэма вечаровай гутаркі, якую мадэравала Кацярына Раманчык, была прафесійна блізкая ўсім прысутным. І хоць колькасць суразмоўцаў была не такая вялікая, як у буйнейшых гарадах, гаворка атрымалася насычанай і змястоўнай. Найлепей падкрэсліў галоўныя праблемы культурніцкай актыўнасці ў малых гарадах прадстаўнік мясцовага Цэнтра культуры, спадар Антон Касцоў: “Дзве бяды стаяць паміж чалавекам і культурай. Першая — проста насупраць Цэнтра культуры — гэта райпо, другая — татальны брак часу праз тое, што трэба бясконца працаваць”.
Прысутныя абмеркавалі не толькі азначаныя праблемы і падзяліліся кожны сваім досведам, але й акрэслілі шляхі іх вырашэння і ўдасканалення наяўных праектаў. Першымі крокамі да наладжвання культурнага жыцця мусяць быць, безумоўна, стасункі інфармацыйныя, таму прысутныя абмяняліся кантактамі ў сяброўскай атмасферы за кубкам кавы. І паабяцалі адно аднаму, што акцый кампаніі ў Бялынічах паболее, а культурна актыўныя людзі будуць браць удзел у “кірмашах праектаў” кампаніі, каб праекты тыя рэалізоўваліся і знаходзілі працяг.
Фота – Зарына Кандрацьева
Чытайце таксама:
“Кірмаш праектаў” у Гомелі: пешаходная вуліца, арт-вёска і сцяна жаданняў
Адбыўся “Кірмаш праектаў” для праграмы “Магілёў – культурная сталіца СНД і Беларусі”
“Кірмаш праектаў” у Віцебску. Чалавек. Культура. Горад.
Ток-шоу “Культурны градус Віцебска: плюс ці мінус?”
AD.NAK! пачаў новы адукацыйны сезон у Віцебску
