На сайце Petitions.by з’явілася петыцыя ад жыхароў аграгарадка Княжыцы Магілёўскага раёна і неабыякавых беларусаў, якія просяць улады падтрымаць і ініцыяваць працэс аднаўлення касцёла XVII стагоддзя.
Што за касцёл?
Як пішуць аўтары петыцыі, касцёл, размешчаны ў аграгарадку Княжыцы, «з’яўляецца значнай часткай культурнай і гістарычнай спадчыны не толькі нашага рэгіёна, але і ўсёй краіны».
Ён быў пабудаваны ў 1681 г. і доўгі час быў цэнтрам духоўнага і культурнага развіцця для мясцовых жыхароў.
На жаль, зараз будынак касцёла знаходзіцца ў нездавальняючым стане і патрабуе капітальнага рамонту і аднаўлення.
Жыхары Княжыц упэўнены, што аднаўленне касцёла захавае культурную спадчыну і прыцягне турыстаў у гэтае месца.
У чым сутнасць петыцыі?
Аўтары просяць улады:
- знайсці магчымасць выдзялення сродкаў з дзяржаўнага ці рэгіянальнага бюджэту на рэстаўрацыю касцёла,
- прыцягнуць спецыялістаў і арганізацыі, якія займаюцца аднаўленнем гістарычных помнікаў.
«Мы верым, што сумеснымі намаганнямі можна вярнуць гэтаму ўнікальнаму архітэктурнаму аб’екту былую веліч і значнасць», — гаворыцца ў петыцыі.
Падпісаць петыцыю можна па спасылцы да 25 жніўня.
Чытайце яшчэ: Топ-5 «заброшак» Магілёўшчыны, якія вам абавязкова трэба паспець убачыць